டெக்சாஸ் மாநிலத்தின் ஆஸ்டின் நகரில் நடந்த நிகழ்ச்சியில், டெஸ்லா நிறுவனம் ‘சைபர்கேப்’ என்ற டிரைவர் இல்லா புதிய காரை அறிமுகம் செய்துள்ளது. நீண்ட நாட்களாக எதிர்பார்ப்பு இருந்த நிலையில் இந்த வெளியீடு நடைபெற்றதாக தெரிவிக்கப்பட்டுள்ளது.
இந்த நிகழ்ச்சிக்கு குறிப்பிட்ட நபர்களுக்கு மட்டுமே அழைப்பு விடுக்கப்பட்டதாகவும், வீடியோ கான்பரன்சிங் வழியாக ஒளிபரப்பு செய்யப்படவில்லை என்றும் தகவல் வெளியாகியுள்ளது.
மின்சாரத்தில் இயங்கும் இந்த கார் முழுமையாக தானாக இயங்கும் வகையில் வடிவமைக்கப்பட்டுள்ளது. இதில் ஸ்டீயரிங் வீலும் பெடல்களும் இல்லை. அதே நேரத்தில் பயணிகள் கட்டுப்படுத்தும் வகையில் அவசர நிறுத்த வசதிகள் உள்ளன; அபாய விளக்குகளை பயன்படுத்தி காரை உடனடியாக நிறுத்த முடியும். மேலும் யுஎஸ்பி-சி போர்ட்கள், கேமரா, கதவு பட்டன்கள் போன்ற அம்சங்களும் இடம் பெற்றுள்ளன.
இது இருவர் மட்டும் பயணம் செய்யும் வகையில் உருவாக்கப்பட்டுள்ளது. இரண்டு பெட்டிகள் வைக்க இடமுள்ளதுடன், கால்களை வசதியாக வைத்துக்கொள்ளும் வகையில் அமைப்பு செய்யப்பட்டுள்ளதாக கூறப்படுகிறது. ரோபோ டாக்ஸி சேவையின் மூலம் பயனர்கள் இதை முன்பதிவு செய்யலாம்; கார் வந்ததும் செயலி மூலம் டிக்கியை திறக்கவும், அருகில் சென்றதும் கதவு தானாக திறக்கவும் வசதி உள்ளது. உள்ளே உள்ள தொடுதிரை மூலம் இருக்கை அமைப்புகள் மற்றும் வெப்பநிலையையும் தேவைக்கேற்ப மாற்ற முடியும்.
தற்போதைக்கு, இந்த கார் ஆஸ்டினின் தேர்ந்த பகுதிகளில் மட்டுமே பயன்பாட்டிற்கு கொண்டு வரப்பட்டுள்ளதாக தெரிவிக்கப்பட்டுள்ளது.
