ஆர்.எஸ்.எஸ். அமைப்பின் நூற்றாண்டு விழா தொடர்பாக பிரிட்டனில் உள்ள தலைவர் மோகன் பாகவத், லண்டனில் நடைபெற்ற நிகழ்ச்சியில் உரையாற்றினார்.
அப்போது, “வேற்றுமையில் ஒற்றுமை” என்பதே ஹிந்து நாகரிகத்தின் அடிப்படை தத்துவம் என அவர் கூறினார். உலகில் காணப்படும் பன்முகத்தன்மை இயல்பானது என்றும், வெளிப்புற வேறுபாடுகளைப் பார்த்து பிரிந்து விடாமல் “ஒன்றே உலகம்” என்ற கருத்தை நினைவில் கொள்ள வேண்டும் என்றும் வலியுறுத்தினார்.
அனைத்து விதமான நம்பிக்கைகளையும் வழிபாட்டு முறைகளையும் ஏற்று, அவற்றுடன் இணைந்து வாழ்வதே ஹிந்து தர்மத்தின் இயல்பு என அவர் தெரிவித்தார். ஹிந்து என்பது வெறும் மதமாகவும், குறிப்பிட்ட புவியியல் எல்லைக்குள் மட்டுமே அடங்கியதாகவும் பார்க்கக் கூடாது; அது கலாசாரத்தின் தனித்துவ அடையாளம் மற்றும் வாழ்வியல் நெறி எனவும் கூறினார்.
மேலும், ஹிந்து சிந்தனை எந்த ஒரு வழிபாட்டு முறையையும் மட்டும் சரியானதாகக் கருதாது; அதனால் பிறரை மதமாற்றம் செய்ய வேண்டிய அவசியம் உருவாகாது என்றார். ஒரே இலக்கை அடைய பல வழிகள் இருக்க முடியும் என்பதை உணர்ந்து அனைவரும் இணைந்து வாழ்வதே இதன் நோக்கம் என அவர் குறிப்பிட்டார்.
வெறுப்பு மற்றும் எதிர்ப்பு உணர்வுகளுக்கு இடமளிக்காமல் இருந்தால் மோதல்களுக்கு எளிதில் தீர்வு காண முடியும் என்றும் அவர் கூறினார்.
