சென்னை: தமிழ்நாடு சட்டசபையில் காவல் துறை மானிய கோரிக்கைகள் மீதான விவாதத்திற்கு பதிலளித்த முதல்வர் விஜய், திமுகவை கடுமையாக விமர்சித்தார்.
சர்க்காரியா கமிஷன் அறிக்கையும் அமலாக்கத்துறை (ED) விசாரணை அறிக்கையும் ஆதாரமாகக் காட்டி, முந்தைய திமுக அரசு மீது தொடர்ச்சியான குற்றச்சாட்டுகளை அவர் முன்வைத்தார். 2021–2026 காலகட்டத்தில் 7.5% முதல் 10% வரை கட்சி நிதி வசூல் செய்யப்பட்டதாக ED அறிக்கையில் ஆதாரங்களுடன் குறிப்பிடப்பட்டுள்ளதாகவும், அன்றைய முதல்வர் மு.க.ஸ்டாலின், துணை முதல்வர் உதயநிதி உள்ளிட்டோர் அதன் நேரடி பயனாளர்கள் எனவும் அவர் கூறினார்.
திமுக மேடைகளில் கூறப்படும் வாசகங்களை சுட்டிக்காட்டிய அவர், திமுக இருக்கும் இடத்தில் தவறு நடக்காது என்பதற்கு மாறாக, தவறு நடக்கும் இடத்தில்தான் திமுக இருக்கும் என விமர்சித்தார். ஊழல் குற்றச்சாட்டுகள் எழும்போது திமுக “ஆதாரம் கொடுங்கள்” என கேட்பதே வழக்கம்; ஊழல் செய்யவில்லை என்று மறுப்பதில்லை என்றும் கூறினார்.
தனிப்பட்ட அவதூறுகளுக்கு தாம் இறங்கமாட்டோம் என்றாலும், மக்களை ஏமாற்றும் திமுகவின் “போலி பிம்பம்” மற்றும் “போலி பிராண்ட்” ஆகியவற்றை பழைய பதிவுகளைத் தோண்டி உடைப்போம் என அவர் தெரிவித்தார். மேலும் 2021–2026 ஆட்சிக்காலத்தில் திமுகவினர் மற்றும் ஆதரவாளர்கள் தொடர்பான பல குற்றங்களில் முதல் தகவல் அறிக்கை (FIR) கூட பதிவு செய்யப்படவில்லை; எதிர்க்கட்சிகள் பிரச்னையாக்கிய பிறகே சில வழக்குகளில் FIR மற்றும் கைது நடவடிக்கைகள் நடந்ததாகவும் குற்றம்சாட்டினார்.
தமது அரசு வெறும் வார்த்தைகளால் அல்லாமல் வெளிப்படைத்தன்மை, பொறுப்புணர்வு மற்றும் செயல்பாடுகள் மூலம் பதிலளிக்கிறது என கூறிய விஜய், ஆளுங்கட்சியினர்மீதே குற்றச்சாட்டு எழுந்தால் வழக்குப்பதிவு செய்யப்பட்டுள்ளதாகவும், தேவையான இடங்களில் கைது மற்றும் கட்சியிலிருந்து நீக்க நடவடிக்கைகள் மேற்கொள்ளப்பட்டுள்ளதாகவும் தெரிவித்தார்.
