சென்னை: சட்டசபையில் இன்று சட்டம்-ஒழுங்கு மானிய கோரிக்கை மீதான விவாதத்தின் போது உரையாற்றிய முதல்வர் விஜய், திமுகவை கடுமையாக விமர்சித்தார். திமுக குறித்து கவிஞர் கண்ணதாசன் கூறியதாக உள்ள வரிகளை மேற்கோள் காட்டி குற்றம்சாட்டினார்.
சமீபத்தில் அவையில் திமுக உறுப்பினர்கள் பேசிய சில கருத்துகளை நினைவூட்டி, தேவையற்ற தூண்டுதலான பேச்சும் தனிநபர் தாக்குதலும் அரசியல் அல்ல என அவர் கூறினார். இப்படியான பேச்சுகள் தொடர்ச்சியாக நடந்தால் அதை மக்கள் பார்த்துக்கொண்டே இருப்பார்கள் என்றும் குறிப்பிட்டார்.
மேலும், ஒரு மூத்த திமுக உறுப்பினர் “மக்கள் ஓட்டு போடவில்லை என்றால் நல்ல சாவே வராது” என்ற பொருளில் பேசியதாக கூறி, மக்களை நோக்கி இப்படிப் பேசுவது எப்படி என கேள்வி எழுப்பினார். கடந்த பல ஆண்டுகளாக இதே மக்கள் தான் அவர்களுக்கு ஆதரவு அளித்ததாகவும் அவர் சுட்டினார்.
மக்கள் தீர்ப்பை ஏற்றுக்கொள்ளும் மனப்பாங்கு அவசியம் என வலியுறுத்திய விஜய், பழைய கால அரசியலில் இப்படிப் பேச்சுகள் இருந்ததாக கூறி ஆபாசம் அல்லது வன்மம் கலந்த பேச்சுகளை நியாயப்படுத்தக் கூடாது என்றார். கடந்த கால அரசியலில் இருந்த நல்லவற்றை மட்டும் எடுத்துக்கொள்ள வேண்டும்; அவதூறும் அசிங்கமும் நிறைந்த அரசியல் தேவையில்லை என்றும் தெரிவித்தார்.
கண்ணதாசன் திமுகவை “பேசி பழகிய பொய், வாங்கி பழகிய கை, போட்டு பழகிய பை” என்று சுருக்கமாகச் சொன்னதாக கூறிய அவர், தனது அரசின் அடையாளம் தனிநபர் அல்ல; “தமிழ், தமிழர், தமிழ்நாடு” தான் என தெரிவித்தார். மக்கள் பணத்தில் இருந்து ஒரு ரூபாய்கூட தொடமாட்டோம்; தொடுபவர்களையும் விடமாட்டோம் என்றும் அவர் கூறினார்.
