இந்திய இளைஞர்கள் செயற்கை நுண்ணறிவு (ஏஐ) தொழில்நுட்பத்தில் நிபுணத்துவம் பெறுவது மிகவும் அவசியம் என பிரதமர் நரேந்திர மோடி தெரிவித்தார். ஏஐ திறன் கொண்டவர்களுக்கான தேவை வேகமாக அதிகரித்து வருவதாகவும் அவர் கூறினார்.
குஜராத் மாநிலம் வதோதராவில் நடைபெற்ற நிகழ்ச்சியில் ரூ.35,000 கோடி மதிப்பிலான வளர்ச்சித் திட்டங்களை பிரதமர் அடிக்கல் நாட்டியும், தொடக்கியும் வைத்தார். ‘சிப்’ முதல் கப்பல்கள் வரை உற்பத்தித் துறையில் இந்தியா புதிய எதிர்காலத்தை உருவாக்கி வருவதாக அவர் குறிப்பிட்டார்.
ரயில்வே பணிகள் மற்றும் கட்டமைப்பு விரிவாக்கங்கள் வேகமாக நடைபெறுவதால் வேலைவாய்ப்புகள் அதிகரிக்கும் எனவும், சரக்கு ரயில் வழித்தடங்கள் மற்றும் சாலைகள் உள்ளிட்ட திட்டங்கள் முன்னெடுக்கப்படுவதாகவும் அவர் பேசினார். 2014க்கு பிந்தைய பணிகளின் வேகத்தை, முந்தைய கூட்டணி ஆட்சிக்கால தாமதங்களுடன் ஒப்பிட்டும் அவர் விமர்சனம் முன்வைத்தார்.
போட்டித் தேர்வுகளுக்கான தயாரிப்பில் மாணவர்கள் செலவிடும் பணச்சுமையை குறைக்கும் வகையில் இலவச இணையவழிப் பயிற்சி வழங்கப்படும் என மோடி தெரிவித்தார். மேலும், பொய்களைப் பரப்பி மக்களை திசைதிருப்ப முயற்சிகள் இருக்கலாம்; ஆனால் இளைஞர்கள் உண்மையின் பக்கம் நிற்பார்கள் என்றும் கூறினார்.
ஏஐ திறன் ஐடி துறையுடன் மட்டும் முடிவடையாது; விவசாயத்திற்கு புதிய தீர்வுகள், சுகாதாரத் தொழில்நுட்ப மேம்பாடு, உற்பத்தித் துறையில் உற்பத்தித் திறன் உயர்வு போன்ற பல துறைகளிலும் பயன்படும் என அவர் விளக்கினார். பிரத்யேக சரக்கு ரயில் வழித்தடங்கள் வேகமாக வளர்ந்து வரும் இந்தியாவின் ‘உயிர்நாடி’ எனவும், நவீன சரக்கு போக்குவரத்து கட்டமைப்பு நாட்டின் மாற்றத்தை துரிதப்படுத்தியுள்ளதாகவும் அவர் கூறினார்.
