சென்னை: வங்கி ஊழியர் சங்கங்கள் அறிவித்துள்ள வேலைநிறுத்தம் மற்றும் தொடர்ந்து வரும் விடுமுறைகள் காரணமாக, நான்கு நாட்கள் வங்கி சேவைகள் பாதிக்கப்படும் நிலை ஏற்பட்டுள்ளது.
வங்கி ஊழியர்களுக்கு வாரத்தில் சனி, ஞாயிறு விடுமுறை வழங்க வேண்டும் என்பதுடன், சாதாரண ஊழியர்களுக்கு எதிராக காட்டப்படும் பாரபட்ச நடவடிக்கைகளை மாற்ற வேண்டும் உள்ளிட்ட கோரிக்கைகளை வலியுறுத்தி, நாடு முழுதும் ஒருநாள் வேலைநிறுத்தம் அறிவிக்கப்பட்டுள்ளது.
இந்த வேலைநிறுத்தம் வெள்ளி நாளில் நடைபெறுவதுடன், சனி-ஞாயிறு வார விடுமுறைகள் மற்றும் திங்கள் விநாயகர் சதுர்த்தி விடுமுறை சேர்ந்து, மொத்தம் நான்கு நாட்கள் வங்கிகள் செயல்பட முடியாத சூழல் உருவாகும் என தெரிவிக்கப்பட்டுள்ளது.
இதுகுறித்து அனைத்திந்திய வங்கி அதிகாரிகள் சங்கத்தின் தமிழக பொதுச்செயலர் ரோஷன் கார்க்கி கூறுகையில், ஊக்கத்தொகை வழங்கலில் உயர் அதிகாரிகள் மற்றும் சாதாரண ஊழியர்கள் இடையே பாரபட்சம் காட்டப்படுவதாகவும், நீண்டகாலமாக நிலுவையில் உள்ள கோரிக்கைகள் நிறைவேற்றப்பட வேண்டும் என்பதற்காகவும் போராட்டம் நடத்தப்படுவதாக தெரிவித்தார்.
மேலும், நாளை ஒருநாள் அடையாள வேலைநிறுத்தத்திற்குப் பிறகு, வரும் 28 முதல் 30ம் தேதி வரை மூன்று நாட்கள் தொடர் வேலைநிறுத்தம் நடைபெறும் என்றும் அவர் கூறினார்.
