இந்திய ரயில்வேக்கு சொந்தமான ஹோட்டல்களை குத்தகைக்கு விடுவதில் முறைகேடு நடந்ததாக கூறப்படும் வழக்கில், பீஹார் முன்னாள் முதல்வரும் ராஷ்ட்ரீய ஜனதா தளத் தலைவருமான லாலு பிரசாத் யாதவ், அவரது மனைவி ராப்ரி தேவி மற்றும் மகன் தேஜஸ்வி யாதவ் மீது ஊழல் வழக்குப்பதிவு செய்ய டில்லி நீதிமன்றம் உத்தரவிட்டுள்ளது.
2004 முதல் 2009 வரை லாலு பிரசாத் யாதவ் மத்திய ரயில்வே அமைச்சராக இருந்த காலகட்டத்தில், ஒடிஷாவின் புரி மற்றும் ஜார்க்கண்டின் ராஞ்சியில் உள்ள ஐ.ஆர்.சி.டி.சி.க்கு சொந்தமான இரண்டு ஹோட்டல்கள், பீஹாரைச் சேர்ந்த சுஜாதா ஹோட்டல்ஸ் பிரைவேட் லிமிடெட் நிறுவனத்திற்கு குத்தகைக்கு விடப்பட்டதாகவும், இதில் முறைகேடு நடந்ததாகவும் குற்றச்சாட்டு எழுந்துள்ளது.
இந்த விவகாரத்தில் அமலாக்கத் துறையும் சி.பி.ஐ.யும் தனித்தனியாக வழக்குகளை பதிவு செய்துள்ளதாக தெரிவிக்கப்பட்டுள்ளது. வழக்கு டில்லி விசாரணை நீதிமன்றத்தில் நடைபெற்று வருகிறது.
கடந்த ஆண்டு அக்டோபர் 13 அன்று லாலு, ராப்ரி, தேஜஸ்வி உள்ளிட்ட 11 பேர் மீது சி.பி.ஐ. குற்றப்பத்திரிகை தாக்கல் செய்ததாகவும், அதை நீதிமன்றம் ஏற்றதாகவும் கூறப்படுகிறது. தற்போது டில்லி ரோஸ் அவென்யூ நீதிமன்றத்தின் சிறப்பு நீதிபதி விஷால் கோக்னே, 9 பேர் மீது ஊழல் வழக்கைப் பதிவு செய்ய உத்தரவிட்டுள்ளார். பீஹாரின் எதிர்க்கட்சி தலைவராக உள்ள தேஜஸ்வி யாதவ் மற்றும் அவரது குடும்பத்தினருக்கு இது கூடுதல் நெருக்கடியை ஏற்படுத்தும் என தெரிவிக்கப்பட்டுள்ளது.
