இன்றைய புகைப்படத்தை அப்லோடு செய்தால் 1980கள் காலத்து தோற்றமாக மாற்றித் தரும் ஏஐ டிரெண்ட் இணையத்தில் பரபரப்பை ஏற்படுத்தியுள்ளது. பிரபலங்கள், சினிமா நட்சத்திரங்கள், கிரிக்கெட் வீரர்கள், பொதுமக்கள் என பலரும் இதில் கலந்துகொண்ட நிலையில், மத்திய அமைச்சர்களும் இணைந்துள்ளனர்.
“Vibing to the 80s trend” என்ற தலைப்புடன் எக்ஸ் தளத்தில் மத்திய அமைச்சர் பீயூஷ் கோயல் பகிர்ந்த படத்தில், கோட் சூட் மற்றும் கூலிங் கிளாஸ் அணிந்த இளம் வயது தோற்றத்தில் அவர் ஸ்டைலாக நடந்து வருவது போல காணப்பட்டது. இதேபோல் அமைச்சர் கிரண் ரிஜிஜூவும் ஒரு ரெட்ரோ ஸ்டைல் படத்தை வெளியிட்டு டிரெண்டில் சேர்ந்தார்.
இதற்கிடையில், உத்தரப் பிரதேசம் நொய்டாவைச் சேர்ந்த ஆகாஷ், ரூ.1,999க்கு ஆன்லைனில் ஒரு ஆண்ட்ராய்டு சாதனம் ஆர்டர் செய்து முன்கூட்டியே பணம் செலுத்தியதாக கூறினார். ஆனால் கூரியரில் வந்த பார்சலில் மாட்டுச்சாணம் இருந்ததாக அவர் புகார் அளித்துள்ளார்; இது சைபர் கிரைம் போலீஸ் விசாரணையில் உள்ளது. இதைப் பார்த்த நெட்டிசன்கள், அறிமுகம் இல்லாத இணையதளங்களில் ஆர்டர் செய்ய வேண்டாம், முன்பணம் செலுத்த வேண்டாம் என அறிவுரை பதிவிட்டு வருகின்றனர்.
மேலும், ‘லிங்க்டுஇன்’ தளத்தில் அமெரிக்காவில் வசிக்கும் பிஎச்.டி. பட்டம் பெற்ற மகனுக்கு ஒரு தாய் வரன் தேடியதாக கூறப்படும் பதிவு விவாதத்தை கிளப்பியது. சிலர் அதை நேர்மையான அணுகுமுறை என பாராட்ட, மற்றவர்கள் தொழில்முறை நெட்வொர்க்கிங் தளத்தை இவ்வாறு பயன்படுத்துவது தவறு என விமர்சித்தனர்.
அதேபோல், அமெரிக்காவில் பள்ளிக் குழந்தைகளை ஏற்றிச் செல்லும் வாகனம் ‘ரெட்’ சிக்னல் காட்டி நிற்கும் போது மற்ற வாகனங்கள் அனைத்தும் நிற்க வேண்டும்; மீறினால் ரூ.47,000 முதல் ரூ.94,000 வரை அபராதம் விதிக்கப்படும் என அமெரிக்காவில் உள்ள விதிமுறைகளை ரித்து ஷர்மா கூறும் இன்ஸ்டாகிராம் வீடியோ வைரலானது. ‘இந்தியாவிலும் இப்படியொரு நடைமுறை வர வேண்டும்’ என்றும் ‘இங்கே இது சாத்தியமா?’ என்றும் நெட்டிசன்கள் கருத்து மோதினர்; இதே நேரத்தில், 2018 முதல் இந்தியாவில் வசிக்கும் ஆஸ்திரியாவைச் சேர்ந்த உல்லாசக் கப்பல் சேவை தொழிலதிபர் ஜர்கன் பெய்லோம் அளித்த பேட்டியும்—செலவுக் கட்டுப்பாடு மற்றும் இந்திய சந்தையை விரைவாகக் கற்றுக்கொண்டது குறித்து—இணையத்தில் பரவலாக பகிரப்பட்டது.
