செயற்கை நுண்ணறிவு (ஏஐ) என்பது “இருமுனை வாள்” போன்றது; இது மோசடிகளை கண்டறியவும், அதே நேரத்தில் மோசடிகளைச் செய்யவும் பயன்படுத்தப்படலாம் என்று மத்திய நிதியமைச்சர் நிர்மலா சீதாராமன் தெரிவித்தார்.
மும்பையில் நடைபெற்ற நிகழ்ச்சியில் பேசிய அவர், இந்திய இளைஞர்கள் தொழில்கள், புதிய தொழில்நுட்பங்கள் மற்றும் டிஜிட்டல் தளங்களை உருவாக்கி நாட்டின் பொருளாதார வளர்ச்சியை வேகப்படுத்தி வருவதாக கூறினார். இளம் திறமையாளர்கள் தங்கள்மீதான சந்தேகங்களைத் தாண்டி வெற்றிகரமான முயற்சிகளை கட்டமைத்து முன்னேறி வருவதாகவும் குறிப்பிட்டார்.
இந்திய ரிசர்வ் வங்கி டிஜிட்டல் ரூபாய் கட்டமைப்பை மேலும் வலுப்படுத்த வேண்டும் என்றும், மொத்த மற்றும் சில்லறை பரிவர்த்தனைகளில் மத்திய வங்கி டிஜிட்டல் நாணயத்தின் பயன்பாட்டை மேம்படுத்த வேண்டும் என்றும் அவர் தெரிவித்தார்.
இந்தியா உலகின் மிக சக்திவாய்ந்த டிஜிட்டல் பொதுக் கட்டமைப்புகளில் ஒன்றை உருவாக்கியுள்ளதாகவும், யுபிஐ மூலம் பல கோடி பரிவர்த்தனைகள் கையாளப்பட்டுள்ளதாகவும் அவர் சுட்டிக்காட்டினார். தொழில்நுட்ப அபாயங்களை கட்டுப்படுத்தும் போதே புதுமைகள் பாதிக்கப்படாத வகையில் நடவடிக்கை தேவை என்றும் வலியுறுத்தினார்.
தொழில்நுட்பம் மற்றும் தொழில்முனைவோர் பங்களிப்பு, 2047க்குள் இந்தியாவை வளர்ந்த நாடாக மாற்றும் பயணத்தின் வேகத்தை நிர்ணயிப்பதாக அவர் கூறினார். எதிர்மறை கருத்துகளை ஒதுக்கி இந்த மாற்றத்தை கொண்டாட வேண்டும் என்றும் அழைப்பு விடுத்தார்.
