ஆப்பிள் நிறுவனம் புதிய ‘ஐபோன் 18’ சீரிஸ் மாடல்களை அறிமுகப்படுத்தியுள்ளது. பல நாடுகளுடன் ஒப்பிடும்போது இந்தியாவில் இதன் விலை அதிகமாக இருப்பதாக துறை வட்டாரங்கள் தெரிவிக்கின்றன.
இந்த சீரிஸில் ‘ஐபோன் 18 புரோ’, ‘ஐபோன் 18 புரோ மேக்ஸ்’ மற்றும் மடிக்கக்கூடிய ‘ஐபோன் டுயோ’ இடம்பெற்றுள்ளன. இந்தியாவில் ‘ஐபோன் டுயோ’ விலை ரூ.2.99 லட்சம்; ‘ஐபோன் 18 புரோ’ ரூ.1.65 லட்சம்; ‘ஐபோன் 18 புரோ மேக்ஸ்’ ரூ.1.79 லட்சம் என நிர்ணயிக்கப்பட்டுள்ளது.
இந்தியாவில் விலை அதிகமாக இருப்பதற்கு பல காரணங்கள் உள்ளதாக நிபுணர்கள் கூறினர். ‘ஐபோன் டுயோ’ முழுமையாக சீனாவில் இருந்து இறக்குமதி செய்யப்படுவதால் செலவு உயர்வதாகவும், கடந்த ஓராண்டில் டாலருக்கு எதிரான ரூபாய் மதிப்பு சுமார் 7% சரிந்திருப்பது ‘புரோ’ மற்றும் ‘புரோ மேக்ஸ்’ விலையை உயர்த்தியதாகவும் அவர்கள் குறிப்பிட்டனர்.
மேலும் உதிரிபாகங்களுக்கான இறக்குமதி வரிகள் காரணமாக இந்திய விலை அமெரிக்காவை விட அதிகமாக இருப்பதாகவும், புதிய மாடல்களுடன் சேர்த்து பழைய ஐபோன் மாடல்களின் விலையும் உயர்த்தப்பட்டுள்ளதாகவும் தெரிவிக்கப்பட்டது. ஏ.ஐ. நிறுவனங்களின் ‘சிப்’ தேவை அதிகரித்ததால் உலகளவில் சிப் விலை உயர்ந்தது; அதன் தாக்கம் பழைய மாடல்களிலும் பிரதிபலிக்கிறது எனவும் கூறப்பட்டது.
அதே நேரத்தில் கனடா (புரோ: ரூ.1.10 லட்சம்; புரோ மேக்ஸ்: ரூ.1.40 லட்சம்; டுயோ: ரூ.2.06 லட்சம்) மற்றும் அமெரிக்கா (புரோ: ரூ.1.14 லட்சம்; புரோ மேக்ஸ்: ரூ.1.23 லட்சம்; டுயோ: ரூ.1.90 லட்சம்) உள்ளிட்ட நாடுகளில் இந்தியாவை விட குறைந்த விலை காணப்படுவதாகவும், ஜப்பான், சிங்கப்பூர், அரபு எமிரேட்ஸ், மலேசியா ஆகிய சந்தைகளிலும் விலை குறைவாக இருப்பதாகவும் பட்டியலில் குறிப்பிடப்பட்டுள்ளது.
