முதல்வர் விஜய் பிரிட்டன் பயணம் மேற்கொண்டதன் முக்கிய நோக்கம், தொழில் துறை உறவுகளை வலுப்படுத்துவதும், தமிழகத்தில் ஏற்கனவே செயல்படும் நிறுவனங்கள் தங்களின் நடவடிக்கைகளை மேலும் விரிவுபடுத்த உதவுவதுமாகும் என்று தமிழக அரசு விளக்கம் அளித்துள்ளது.
அரசு வெளியிட்ட அறிக்கையில், த.வெ.க. அரசு பொறுப்பேற்ற 100 நாட்களில் முதலீட்டாளர்கள் மாநாடு வழியாக ரூ.1 லட்சம் கோடியைத் தாண்டிய முதலீட்டு புரிந்துணர்வு ஒப்பந்தங்கள் கையெழுத்தாகியுள்ளதாக கூறப்பட்டுள்ளது. மேலும், ஐரோப்பிய நாடுகளைச் சேர்ந்த பன்னாட்டு நிறுவனங்கள் ரூ.8,491 கோடி மதிப்பிலான முதலீட்டு திட்டங்களை முன்வைத்துள்ளன; இதன் மூலம் 5,690 பேருக்கு வேலைவாய்ப்புகள் உருவாகும் என எதிர்பார்க்கப்படுவதாகவும் தெரிவிக்கப்பட்டுள்ளது.
பிரிட்டனைச் சேர்ந்த நிறுவனங்கள் நீண்ட காலமாக தமிழகத்தில் பொறியியல், நிதிசேவைகள், தொழில்நுட்பம் உள்ளிட்ட துறைகளில் குறிப்பிடத்தக்க அளவில் செயல்பட்டு வருவதாக அறிக்கை சுட்டிக்காட்டுகிறது. பல நிறுவனங்கள் உற்பத்தி ஆலைகள் மற்றும் உலகளாவிய திறன் மையங்களை அமைத்து இயங்கி வருவதால், இத்தகைய உறவுகளை மேலும் வலுப்படுத்தி உயர்தர வேலைவாய்ப்புகளுக்கான வாய்ப்புகளை உருவாக்குவதே பயணத்தின் நோக்கம் என அரசு தெரிவித்துள்ளது.
மேலும், உலகத்தரம் வாய்ந்த ‘மோட்டார் ஸ்போர்ட்ஸ் நகரம்’ அமைப்பதாக முதல்வர் அறிவித்துள்ள நிலையில், அதனை முன்னெடுக்க உலகின் முன்னணி மோட்டார் ஸ்போர்ட்ஸ் உள்கட்டமைப்பு வசதிகளை நேரில் பார்வையிட்டு சிறந்த நடைமுறைகளை அறிந்து கொள்வது பயனுள்ளதாக இருக்கும் என்றும் கூறப்பட்டுள்ளது. இதன் ஒரு பகுதியாக ‘சில்வர் ஸ்டோன்’ மோட்டார் ரேசிங் சர்க்யூட்டை பார்வையிட திட்டமிடப்பட்டுள்ளதாகவும் தெரிவிக்கப்பட்டுள்ளது.
முதல்வர் தலைமையிலான குழு சென்னையிலிருந்து நேற்று புறப்பட்டு, செப்டம்பர் 17ஆம் தேதி மீண்டும் சென்னை திரும்ப உள்ளது. குழுவில் பொதுப்பணித்துறை அமைச்சர் ஆதவ் அர்ஜுனா, தமிழ்நாடு விளையாட்டு மேம்பாட்டு ஆணைய உறுப்பினர் செயலர் மேகநாத ரெட்டி, தொழில்துறை வழிகாட்டி நிறுவன இயக்குநர் தீபக் ஜேக்கப் உள்ளிட்ட அரசு அலுவலர்கள் இடம்பெற்றுள்ளனர்.
