மதுராந்தகம் சட்டமன்றத் தொகுதியில் உள்ளூர் வேட்பாளரை தவிர்த்து வெளியூரைச் சேர்ந்தவரை நிறுத்திய தி.மு.க. முடிவு, கட்சியின் உள்ளூர் நிர்வாகிகள் மத்தியில் அதிருப்தியை ஏற்படுத்தியுள்ளதாக தகவல்கள் தெரிவிக்கின்றன. தி.மு.க. தலைவர் மு.க. ஸ்டாலின், சென்னையைச் சேர்ந்த முன்னாள் எம்.எல்.ஏ. பரந்தாமனை வேட்பாளராக அறிவித்துள்ளார்.
கடந்த பத்து ஆண்டுகளாக தொகுதியில் பணியாற்றி வரும் ஒன்றிய செயலர்கள் உள்ளிட்ட முக்கிய நிர்வாகிகள் பலர் சீட் கனவில் இருந்ததாகவும், வாய்ப்பு கிடைக்காததால் சிலர் தேர்தல் பணிகளில் ஈடுபடாமல் இருக்க திட்டமிடுவதாகவும் கூறப்படுகிறது.
மேலும், மதுராந்தகத்தில் தலித், வன்னியர், முதலியார் உள்ளிட்ட சமூகங்களின் வாக்குகள் வெற்றியை தீர்மானிக்கும் நிலையில், உள்ளூர் நிர்வாகிகளுக்கே சமூக சமன்பாடுகள் நன்கு தெரியும்; வெளியூர் வேட்பாளரால் அனைத்துக் குழுக்களையும் ஒருங்கிணைப்பது சிரமமாகலாம் என்ற கருத்தும் முன்வைக்கப்படுகிறது.
இந்த அதிருப்தியை பயன்படுத்தி தி.மு.க. வாக்குகளை சிதறடிக்க த.வெ.க. தரப்பு திட்டமிடுவதாகவும், உள்ளூர் நிர்வாகிகள் செலவிட முன்வராததால் பூத் கமிட்டி பணிகள் பலவீனமடையலாம் என்ற அச்சமும் வெளிப்படுகிறது.
மதுராந்தகம் மற்றும் தாராபுரம் தொகுதிகளுக்கு அக்.6 அன்று இடைத்தேர்தல் நடைபெற உள்ளது. தி.மு.க. சார்பில் மதுராந்தகத்தில் பரந்தாமன், தாராபுரத்தில் சுகன்யா போட்டியிடுகின்றனர். தேர்தல் பொறுப்பாளர்களாக மதுராந்தகத்திற்கு அன்பரசன் மற்றும் சுந்தர்; தாராபுரத்திற்கு துணை பொதுச்செயலர் சாமிநாதன் மற்றும் பத்மநாபன் நியமிக்கப்பட்டுள்ளனர்.
