விநாயகர் சதுர்த்தி விசர்ஜன ஊர்வலங்களில் பெண்கள் மற்றும் குழந்தைகள் பங்கேற்பதைத் தடுக்கின்றதாக கூறப்படும் உத்தரவை உடனடியாக திரும்பப் பெற வேண்டும் என்று ஹிந்து முன்னணி வலியுறுத்தியுள்ளது.
திருப்பூரில் இருந்து வெளியிட்ட அறிக்கையில், மாநிலத் தலைவர் காடேஸ்வரா சுப்ரமணியம், விருதுநகர் மாவட்டம் அருப்புக்கோட்டையில் ஆர்.டி.ஓ. தலைமையில் நடைபெற்ற விநாயகர் சதுர்த்தி ஆலோசனைக் கூட்டத்தில் இந்தக் கட்டுப்பாடுகள் தெரிவிக்கப்பட்டதாக கூறினார். ஊர்வலத்தில் பெண்கள், குழந்தைகள் பங்கேற்கக் கூடாது என்றும், “முளைப்பாரி” எடுத்து வரக் கூடாது என்றும் கூறப்பட்டதாக அவர் குறிப்பிட்டார்.
இத்தகைய நிபந்தனைகள் ஹிந்துக்களின் மத வழிபாட்டு உரிமைக்கு எதிரானவை என அமைப்பு தெரிவித்தது. மேலும், பள்ளிவாசல் அருகே மேள தாளம் வாசிப்போர் குறிப்பிட்ட தூரத்தில் நிறுத்தப்பட வேண்டும் என்பதும், சாலைகளில் செல்லும் உரிமைக்கு கட்டுப்பாடுகள் விதிப்பதும் ஏற்றுக்கொள்ள முடியாதவை என்றும் எதிர்ப்பு தெரிவித்தது.
அருப்புக்கோட்டை ஆர்.டி.ஓ. பிறப்பித்ததாக கூறப்படும் உத்தரவை உடனடியாக திரும்பப் பெற வேண்டும் என்றும், இல்லையெனில் ஹிந்து முன்னணி சார்பில் நடைபெறும் விசர்ஜன ஊர்வலத்தை ஒத்திவைக்க வேண்டிய நிலை ஏற்படலாம் என்றும் எச்சரித்தது. விழா சிறப்பாக நடைபெற அதிகாரிகள் உரிய கவனத்துடன் செயல்பட வழிகாட்ட வேண்டும் என்றும் அறிக்கையில் கேட்டுக்கொள்ளப்பட்டுள்ளது.
