‘தினமலர்’ நாளிதழின் பவள விழாவில் பேசிய எழுத்தாளர் ஜெயமோகன், அச்சு ஊடகம் தன்னுடைய ஆற்றலை இழப்பதற்கான வாய்ப்பு அடுத்த 25 ஆண்டுகளுக்கு தன் கண்களுக்கு படவில்லை என்று தெரிவித்தார்.
தமிழகம் முழுவதும் விரிந்திருந்தாலும், ‘தினமலர்’ குமரி மாவட்டத்தில் இருந்து முளைத்து வளர்ந்த இதழ் என்றும், ஒருங்கிணைந்த திருவிதாங்கூர் சமஸ்தானப் பகுதியிலிருந்து தொடங்கி இன்று பெரிய நிறுவனமாக வளர்ந்துள்ளதாகவும் அவர் நினைவுகூர்ந்தார். எழுத்தாளர் சுந்தர ராமசாமியுடன் உள்ள தொடர்பையும் குறிப்பிட்டு, குமரி மாவட்ட உருவாக்கத்தில் ‘தினமலர்’ வகித்த பங்கையும் அவர் சுட்டினார்.
மேலும், வையாபுரி பிள்ளையின் பாரம்பரியத்தை எடுத்துரைத்த ஜெயமோகன், தமிழில் தொடங்கப்பட்ட கலைக்களஞ்சிய முயற்சி மற்றும் வையாபுரி பிள்ளை தலைமையில் மாணவர்களின் உழைப்பால் உருவான முதல் முழுமையான பேரகராதி போன்ற பணிகள் சாதாரணமானவை அல்ல; அவை மகத்தான வாழ்க்கைப் பணிகள் என்றார்.
‘தி இந்து’வில் பணியாற்றும் கோலப்பன் கூறியதாக, வி.ஏ. சுப்பிரமணியம் சொன்ன ஒரு நிகழ்வையும் அவர் பகிர்ந்தார். ராமசுப்பையர் தன் வயல்களை விற்று நாளிதழ் தொடங்கியதாகக் கூறப்படும் அந்த முடிவு, பத்திரிகை வணிகமாக இல்லாமல் சேவையாகக் கருதப்பட்ட காலத்தில் எடுத்த அபூர்வமான தீர்மானம் என்றும், 1950–60களுக்குப் பிறகே அச்சுத்தொழில் லாபகரமாக மாறத் தொடங்கியதாகவும் அவர் கூறினார்.
இணைய ஊடக வளர்ச்சியால் கடந்த 25 ஆண்டுகளில் அச்சு ஊடகத்தின் முக்கியத்துவம் குறைந்ததாக ஒப்புக்கொண்ட அவர், 2026-ல் அமெரிக்கா சென்றபோது அச்சு இதழ்கள் மீண்டும் அதிகமாகப் படிக்கப்படுவதையும், அச்சு நூல்கள் விற்பனையாகுவதையும் கவனித்ததாக தெரிவித்தார். அமெரிக்காவிலேயே அச்சு உடனடியாக மறைந்து போகும் தடயங்கள் இல்லை என்றும், அங்குள்ள போக்குகள் அடுத்த சில தசாப்தங்களில் இந்தியாவுக்கும் வரும் என்ற கருத்தையும் அவர் முன்வைத்தார்.
