தெஹல்கா பத்திரிகை நிறுவனர் தருண் தேஜ்பால் (62), முன்னாள் பெண் ஊழியருக்கு பாலியல் தொல்லை அளித்ததாக உள்ள வழக்கில், மும்பை உயர் நீதிமன்றத்தின் கோவா கிளையில் திங்களன்று சரணடைந்தார்.
இந்த வழக்கு 2013-ல் கோவாவில் உள்ள ஒரு சொகுசு ஹோட்டலில் நடைபெற்ற தெஹல்கா ஆண்டு விழா நிகழ்ச்சியுடன் தொடர்புடையது. அப்போது லிப்டுக்குள் வைத்து இளம் பெண் பத்திரிகையாளரை பாலியல் வன்கொடுமை செய்ததாக புகார் அளிக்கப்பட்டது.
இந்த வழக்கில் தேஜ்பால் முன்பு சுமார் ஆறு மாதங்கள் சிறைவாசம் அனுபவித்த நிலையில், உச்ச நீதிமன்றம் ஜாமின் வழங்கியது. 2017 முதல் விசாரணை நீதிமன்றத்தில் வழக்கு நடந்துவந்த நிலையில், 2021-ல் அவர் விடுதலை செய்யப்பட்டார்.
அந்த விடுதலையை எதிர்த்து கோவா அரசு மேல்முறையீடு செய்தது. கடந்த ஆகஸ்டில், உயர் நீதிமன்றத்தின் கோவா கிளை பல்வேறு பிரிவுகளின் கீழ் அவரை குற்றவாளி எனத் தீர்ப்பளித்து, அதிகபட்சமாக 10 ஆண்டு சிறைத் தண்டனையும் ரூ.5 லட்சம் அபராதமும் விதித்தது.
விசாரணையின்போது வயதை காரணமாகக் காட்டி கருணை கோரிய தேஜ்பால் தரப்பு, உச்ச நீதிமன்றத்தில் மேல்முறையீடு செய்ய வசதியாக தண்டனையை 8 வாரங்களுக்கு நிறுத்தி வைக்கவும் கேட்டது. நீதிமன்றம் அதை ஏற்காமல் சரணடைய உத்தரவிட்டு, பின்னர் அவகாசத்தை 4 வாரங்களாக நீட்டித்த நிலையில், அந்த காலக்கெடு முடிந்ததும் அவர் இன்று சரணடைந்தார்.
