வரவுள்ள இரண்டு சட்டசபை தொகுதி இடைத்தேர்தலில் தி.மு.க. வெற்றி பெற வேண்டும்; அந்த வெற்றி ஆளும் கட்சியின் வீழ்ச்சிக்கு தொடக்கமாக அமைய வேண்டும் என்று எதிர்க்கட்சி தலைவர் உதயநிதி நேற்று வலியுறுத்தினார்.
சென்னை வேளச்சேரி பகுதியைச் சேர்ந்த தி.மு.க. நிர்வாகியின் திருமண விழாவில் கலந்து கொண்டு அவர் இதை தெரிவித்தார்.
தி.மு.க. பல வெற்றிகளையும் தோல்விகளையும் கண்டுள்ளதாக கூறிய உதயநிதி, கடந்த சட்டசபை தேர்தலில் வெற்றி வாய்ப்பை இழந்தாலும், மக்களோடு நின்று சிறப்பான எதிர்க்கட்சியாக செயல்படுகிறோம் என பேசினார்.
மாநிலம் முழுவதும் மின்வெட்டு நிலவுகிறது என்றும், சட்டம்-ஒழுங்கு நிலைமை குறித்து தனியாக சொல்ல வேண்டியதில்லை என்றும் அவர் குற்றம்சாட்டினார். மேலும் அரிசி, பருப்பு போன்ற அத்தியாவசியப் பொருட்களின் விலைவாசி உயர்வதும், பற்றாக்குறை அதிகரிப்பதும் தொடர்கிறது; இதுகுறித்து கேள்வி எழுப்பினால் முதல்வரால் பதில் சொல்ல முடியவில்லை என்றும் தெரிவித்தார்.
மற்றொரு கட்சியின் எம்.எல்.ஏ.க்களை விலைக்கு வாங்கி ஆட்சி அமைத்ததால்தான் இரண்டு தொகுதிகளுக்கு இடைத்தேர்தல் வருவதாகவும், அந்த இடைத்தேர்தலில் ஆட்சியாளர்களுக்கு சரியான பாடம் புகட்டும் வகையில் அனைவரும் உறுதிமொழி ஏற்று பணியாற்ற வேண்டும் என்றும் அவர் கேட்டுக்கொண்டார்.
