சென்னை: முன்னாள் முதல்வர் சி.என். அண்ணாதுரையின் பிறந்தநாளை முன்னிட்டு, தமிழ்மொழியின் பெருமையைப் பாதுகாக்க இந்நாளில் உறுதியேற்போம் என்று முதல்வர் விஜய் தெரிவித்தார்.
வெளியிட்ட அறிக்கையில், தமிழக அரசியல் வரலாற்றில் புதிய அத்தியாயத்தை உருவாக்கிய அண்ணாதுரை, ஏழை எளிய மக்களின் உரிமைகளுக்காகத் தொடர்ந்து குரல் கொடுத்தவர் என அவர் குறிப்பிட்டார். அவரது தொலைநோக்குப் பார்வையும் மக்கள் சேவையும் நினைவுகூரத்தக்கவை என்றும் கூறினார்.
மேடைப் பேச்சும் எழுத்தாற்றலும் மூலம் மக்களின் ஆதரவைப் பெற்ற அண்ணாதுரை ஆட்சிப் பொறுப்பேற்றதாகவும், தமிழ்மொழி மீதான ஆழ்ந்த பற்றால் மாநிலத்திற்கு “தமிழ்நாடு” எனப் பெயர் சூட்டியதாகவும் முதல்வர் நினைவூட்டினார். மாநில சுயாட்சிக்கான அடித்தளத்தை அமைத்ததுடன், சுயமரியாதைத் திருமணங்களுக்கு சட்ட அங்கீகாரம் வழங்கியதையும் அவர் சுட்டிக்காட்டினார்.
“கடமை, கண்ணியம், கட்டுப்பாடு”, “ஏழையின் சிரிப்பில் இறைவனைக் காண்போம்” போன்ற உயரிய முழக்கங்களை மனதில் ஏந்தி, சமூகநீதியும் சமத்துவமும் சகோதரத்துவமும் எங்கும் தழைத்தோங்கவும், தமிழின் பெருமை காக்கவும் இந்நாளில் உறுதியேற்போம் என்று முதல்வர் விஜய் கேட்டுக்கொண்டார்.
