திருச்சி: ஹிந்து சமய அறநிலையத்துறை வெளியிட்ட சமீபத்திய சுற்றறிக்கை, கோவில்களில் திட்டங்கள் நடைமுறைக்கு வரும் விதம் குறித்து விவாதத்தை உருவாக்கியுள்ளது. கள நிலவரத்தைப் பார்க்காமல் முடிவுகள் எடுக்கப்படும்போது பல முயற்சிகள் தடுமாறுகின்றன என ஆன்மிக நல விரும்பிகள் மற்றும் முன்னாள் கோவில் நிர்வாகத்தினர் கூறுகின்றனர்.
சுற்றறிக்கையில், முதுநிலை கோவில்களில் பிரசாதத்தை கோவில் வளாகத்திலேயே தயாரித்து விற்பனை செய்ய வேண்டும்; தனியார் நிறுவனங்களுக்கு அவுட்சோர்சிங் செய்யக் கூடாது என தெரிவிக்கப்பட்டதாக கூறப்படுகிறது. ஆனால் இது உடனடியாக அமல்படுத்த வேண்டுமா, அல்லது அவகாசம் வழங்கப்படுமா என்பது தெளிவாக குறிப்பிடப்படவில்லை.
மேலும், எல்லா கோவில்களிலும் தேவையான மடப்பள்ளி வசதி, சமையலர் மற்றும் உதவியாளர்கள் உள்ளனவா என்பதை மதிப்பீடு செய்யாமல் உத்தரவு வந்துள்ளதாக விமர்சனம் உள்ளது. விற்பனை செய்யப்படும் பிரசாதத்திற்கு எப்.எஸ்.எஸ்.ஏ.ஐ. (FSSAI) சான்றிதழ்/அனுமதி தொடர்பான விளக்கம் இல்லாததும் குழப்பத்தை ஏற்படுத்துகிறது என அவர்கள் சுட்டிக்காட்டுகின்றனர்.
முந்தைய ஆட்சியில் தொடங்கப்பட்ட “நித்திய பிரசாதம்” திட்டத்தின் கீழ் பல கோவில்களில் காலை முதல் இரவு வரை இலவசமாக ஏதாவது ஒரு பிரசாதம் வழங்கப்படும் நிலையில், புதியதாக ஒவ்வொரு கோவிலிலும் பிரசாதம் தயாரித்து விற்பனை செய்வது அவசியமா என்ற கேள்வியும் எழுகிறது. பல கோவில்களில் பணியாளர் பற்றாக்குறை மற்றும் அனுமதி தாமதம் காரணமாக பல பணிகள் முடங்கியுள்ளதாகவும் அவர்கள் கூறுகின்றனர்.
அறநிலையத்துறை அதிகாரிகள் மட்டத்தில் திட்டங்களை வகுப்பதைவிட, தினசரி நிர்வாகத்தை நடத்தும் டிரஸ்டிகள் மற்றும் கோவில் நிர்வாகத்தினரை நேரில் அழைத்து அமைச்சர் ரமேஷ் கலந்தாலோசிக்க வேண்டும் என்ற எதிர்பார்ப்பு அதிகரித்துள்ளது. அதிகாரிகள் இல்லாமல் நேரடி சந்திப்பு நடந்தால் உண்மையான நிலவரம் தெரிய வரும்; அதன்மூலம் நடைமுறை சிக்கல்கள் தவிர்க்கப்பட்டு கோவில்களின் மேம்பாடு மற்றும் சொத்துகள் மீட்பு போன்ற பணிகளில் கவனம் செலுத்த முடியும் என அவர்கள் வலியுறுத்துகின்றனர்.
