வேலூரில் அரசு சுற்றுலா மாளிகையில் நடைபெற்ற ஊடகப் பேட்டியின் போது திடீரென மின்தடை ஏற்பட்டதால், அமைச்சர் செங்கோட்டையன் மொபைல் போன் விளக்கின் உதவியுடன் பேட்டியைத் தொடர்ந்தார்.
அங்கு போதிய வெளிச்சம் இல்லாத நிலையில் சில நேரம் பேட்டி நடைபெற்றதாக கூறப்படுகிறது. பின்னர் மின்சாரம் மீண்டும் வந்தாலும், தமிழகம் முழுவதும் அறிவிக்கப்படாத மின்வெட்டு நிலவுகிறது என்ற குற்றச்சாட்டுகள் உள்ள சூழலில் அமைச்சரின் நிகழ்ச்சியிலேயே மின்தடை ஏற்பட்டது கவனம் பெற்றுள்ளது.
பேட்டியில், விவசாய நிலங்களை பிற பயன்பாட்டுக்கு மாற்ற எளிதாக்கும் சட்டத் திருத்தம் உணவு பாதுகாப்புக்கு பாதிப்பு ஏற்படுத்தும் என்ற விமர்சனங்களுக்கு அவர் பதிலளித்தார். விதைகள், உரங்கள் உள்ளிட்டவை வழங்கப்படுவதால் உற்பத்தி முன்பைவிட அதிகரித்துள்ளதாகவும் அவர் கூறினார்.
மேலும், தமிழகத்தில் தற்போது நிலவரி இல்லை என்றும், ஆங்கிலேயர் ஆட்சிக் காலத்தில் இருந்ததாகவும் குறிப்பிட்டார். இடைத்தேர்தலில் இரு கம்யூனிஸ்ட் கட்சிகள் தனித்தனியாக போட்டியிடுவதால் த.வெ.க.க்கு பின்னடைவு இல்லை என்றும் தெரிவித்தார்.
முதல்வர் விஜயின் லண்டன் பயணம் குறித்து வெள்ளை அறிக்கை வெளியிட வேண்டும் என்ற கோரிக்கைக்கு பதிலளித்த அவர், வெளியில் இருந்து பேசுவது எளிது என்றும், முதலீட்டாளர்களை ஈர்க்க கட்டமைப்பு வசதிகள், தடை இல்லா மின்சாரம், போக்குவரத்து ஆகியவை அவசியம் என்றும் கூறினார்.
