இந்தியா உள்ளிட்ட நாடுகள் மீது அதிகபட்சம் 100 சதவீதம் வரை வரி விதிக்க அமெரிக்க அதிபர் டிரம்புக்கு அதிகாரம் அளிக்கும் வகையிலான மசோதா, அமெரிக்க பிரதிநிதிகள் சபையில் 262-159 என்ற வாக்கு வித்தியாசத்தில் நிறைவேற்றப்பட்டது.
ரஷ்யா–உக்ரைன் போர் காரணமாக உலகளவில் எரிசக்தி சந்தையில் பாதிப்புகள் ஏற்பட்ட நிலையில், ரஷ்யா தள்ளுபடி விலையில் கச்சா எண்ணெயை வழங்கி வருவதாகவும், இதனால் இந்தியா ரஷ்யாவிடமிருந்து அதிக அளவில் கச்சா எண்ணெய் வாங்கி வருவதாகவும் செய்தி குறிப்பிடுகிறது. ரஷ்யாவுக்கு பொருளாதார அழுத்தம் அதிகரிக்க, அதன் எரிசக்தித் துறையை குறிவைத்து அமெரிக்கா நடவடிக்கைகள் எடுத்து வருகிறது.
இந்த மசோதா ரஷ்யா மற்றும் ஈரானுக்கு எதிரான பொருளாதார தடைகளை விரிவுபடுத்தும் வகையில் அமைந்துள்ளது. பிரதிநிதிகள் சபையில் குடியரசுக் கட்சியினர் ஆதரவு அளித்த நிலையில், ஜனநாயகக் கட்சியைச் சேர்ந்த இரு உறுப்பினர்களும் கட்சி நிலைப்பாட்டை மீறி ஆதரவாக வாக்களித்ததாக தெரிவிக்கப்பட்டுள்ளது.
இந்த மசோதா கடந்த மாதமே அமெரிக்க செனட் சபையில் 86-11 என்ற வாக்குகளுடன் நிறைவேற்றப்பட்டிருந்தது. பல மாத தாமதத்திற்குப் பிறகு, தற்போது இது ஒப்புதலுக்காக அதிபர் டிரம்பிடம் அனுப்பி வைக்கப்பட்டுள்ளது.
ஜனநாயகக் கட்சி உறுப்பினர் ஸ்டெனி ஹோயர் கொண்டு வந்த திருத்தத்தில், ரஷ்ய கச்சா எண்ணெய் வாங்கும் 10 நாடுகளின் பட்டியல் இடம்பெற்றுள்ளது. அதில் இந்தியாவுடன் சீனா, துருக்கி, அஜர்பைஜான், ஹங்கேரி, ஸ்லோவாக்கியா, ஐக்கிய அரபு எமிரேட்ஸ், சிங்கப்பூர், கஜகஸ்தான், கிர்கிஸ்தான் ஆகிய நாடுகளும் உள்ளன. இந்த நாடுகள் அமெரிக்காவுக்கு ஏற்றுமதி செய்யும் பொருட்களுக்கு 100 சதவீதம் வரை வரி விதிக்கப்படும் அபாயம் உருவாகியுள்ளதாக கூறப்படுகிறது.
