யு.பி.ஐ. டிஜிட்டல் பணப் பரிவர்த்தனைகளில் வணிகர்களிடம் கட்டணம் வசூலிக்கும் முன்மொழிவைச் சுற்றி, காங்கிரஸ் “இரட்டை நிலைப்பாடு” எடுக்கிறது என மத்திய அரசு குற்றஞ்சாட்டியுள்ளது. முதலில் ஆதரவு தெரிவித்துவிட்டு தற்போது எதிர்ப்பதாக அரசு தரப்பு விமர்சித்தது.
தேசிய பணப் பரிவர்த்தனை கழகம் (NPCI) அறிவிப்பின்படி, கடைகள் மற்றும் வர்த்தக நிறுவனங்கள் யு.பி.ஐ. மூலம் ரூ.2,000-க்கு மேல் பெறும் தொகைக்கு 0.4% கட்டணம் செலுத்த வேண்டும் என கூறப்பட்டுள்ளது. இது வணிகர்களுக்கு மட்டுமே பொருந்தும்; தனிநபர்-தனிநபர் பரிவர்த்தனைகள் வழக்கம்போல் கட்டணமின்றி தொடரும் என அரசு தரப்பு தெரிவித்தது.
இதற்கு காங்கிரஸ் கடும் எதிர்ப்பு தெரிவித்து, அமெரிக்க அழுத்தத்திற்கு மத்திய அரசு பணிந்துவிட்டதாக குற்றம்சாட்டியது. ஆனால் ஆகஸ்ட் 12-ம் தேதி நடந்த நிதித் துறைக்கான பார்லிமென்ட் நிலைக்குழு கூட்டத்தில் இந்த முடிவு பேசப்பட்டபோது, அங்கு இருந்த காங்கிரஸ் எம்.பி.க்கள் யாரும் எதிர்ப்பு தெரிவிக்கவில்லை என மத்திய அரசு கூறியது.
யு.பி.ஐ. கட்டமைப்பின் நிதி நிலைத்தன்மைக்காக அடுக்குமுறை வருவாய் முறை உருவாக்க வேண்டும் என்ற அறிக்கை குழு உறுப்பினர்களிடம் வழங்கப்பட்டதாகவும், எம்.டி.ஆர். (MDR) என்பது வரி அல்ல என்றும் அரசு தரப்பு விளக்கம் அளித்தது. மேலும், அந்த அறிக்கைக்கு ஒப்புதல் தெரிவித்துவிட்டு தற்போது எதிர்ப்பது ஏன் எனவும் கேள்வி எழுப்பியது.
இதற்கிடையில், யு.பி.ஐ. கட்டண விவாதத்தில் தாங்கள் பங்கேற்கவில்லை என காங்கிரஸ் எம்.பி.க்கள் கவுரவ் கோகாய் மற்றும் மணிஷ் திவாரி மறுப்பு தெரிவித்துள்ளனர். இதனால், யு.பி.ஐ. கட்டண விவகாரத்தில் மத்திய அரசு மற்றும் காங்கிரஸ் தரப்புக்கு இடையே வார்த்தை போர் தீவிரமடைந்துள்ளது.
