அசாமிலிருந்து தமிழக கோயில்களுக்கு 5 வளர்ப்பு யானைகளை இடமாற்றம் செய்வதை தடுக்கக் கோரி தாக்கல் செய்யப்பட்ட மனுவில், கவுகாத்தி உயர் நீதிமன்றம் தற்போது தடை உத்தரவு வழங்க மறுத்துள்ளது.
நீதிபதிகள் அசுதோஷ்குமார் மற்றும் அருண்தேவ் சவுத்ரி ஆகியோர் அடங்கிய அமர்வு, இந்நிலையில் யானைகளை வேறு மாநிலத்திற்கு மாற்றுவதைத் தடுக்கத் தேவையான தெளிவான காரணம் இல்லை எனக் குறிப்பிட்டது. மனுதாரர் தரப்பில், முன்பு தமிழகத்திற்கு மாற்றப்பட்ட ஒரு யானை அனுமதிக்கப்பட்ட காலத்தைத் தாண்டியும் அங்கேயே இருந்ததாகவும், கோயில்களுக்கு அனுப்பப்படும் யானைகள் தவறாக நடத்தப்பட வாய்ப்பு இருப்பதாகவும் வாதிடப்பட்டது.
யானைகள் இடமாற்றத்திற்கு தேவையான அனுமதிகள் பெறப்படவில்லை என்பதை நிரூபிக்கும் வரை தடை உத்தரவு பிறப்பிக்க முடியாது என நீதிமன்றம் தெரிவித்தது. மேலும், யானைகள் தனியார் வசம் ஒப்படைக்கப்பட்டுள்ள நிலையில், அவற்றின் ஆரோக்கியம் பாதுகாக்கப்படுகிறதா மற்றும் வேறு எந்த செயல்களுக்கும் பயன்படுத்தப்படவில்லையா என்பதை உறுதி செய்ய வேண்டிய அவசியம் இருப்பதாகவும் கூறப்பட்டது.
இதையடுத்து வழக்கு விசாரணை ஒத்திவைக்கப்பட்டு, அடுத்த விசாரணையில் அசாம் மாநில கூடுதல் அட்வகேட் ஜெனரல் பதிலளிக்க வேண்டும் என உத்தரவிடப்பட்டது. வழக்கு மீண்டும் அக்.15 அன்று விசாரணைக்கு வருகிறது.
முன்னதாக, அசாமின் மனாஸ் தேசிய பூங்காவில் இருந்து ‘துர்கா’ எனப்படும் 5 வயது யானை செப்.7 அன்று தமிழகத்திற்கு கொண்டு செல்லப்பட்டதாகவும் மனுவில் குறிப்பிடப்பட்டுள்ளது.
