மாவட்டங்களில் தேவைக்கேற்ப நேரடி நெல் கொள்முதல் நிலையங்களை (DPPC) திறந்து நெல் கொள்முதல் செய்ய கலெக்டர்களுக்கு மீண்டும் அதிகாரம் வழங்கப்பட்டுள்ளதாக தமிழக அரசு தெரிவித்துள்ளது.
மாநிலத்தில் போதிய அளவில் கொள்முதல் நிலையங்கள் திறக்கப்படவில்லை என்ற தகவல்கள் வெளியான நிலையில், தமிழ்நாடு நுகர்பொருள் வாணிபக் கழக நிர்வாக இயக்குநர் ஷில்பா பிரபாகர் சதீஷ் நடப்பு பருவ நிலவரம் மற்றும் மேற்கொள்ளப்பட்ட நடவடிக்கைகள் குறித்து விளக்கம் அளித்துள்ளார்.
கடந்த ஆண்டு 4,329 நேரடி நெல் கொள்முதல் நிலையங்கள் திறக்கப்பட்டு, 6,22,487 விவசாயிகளிடமிருந்து 65,16,373 டன் நெல் கொள்முதல் செய்யப்பட்டதாக அவர் கூறினார். நடப்பாண்டில் செப்டம்பர் 1 முதல் கொள்முதல் நடைபெற்று வருவதுடன், இதுவரை 487 நிலையங்கள் திறக்கப்பட்டு 68,795 டன் நெல் வாங்கப்பட்டுள்ளது.
கடந்த ஆண்டு இதே தேதியில் 870 நிலையங்கள் திறக்கப்பட்டு 1,69,190 டன் கொள்முதல் செய்யப்பட்டிருந்ததாகவும் தெரிவிக்கப்பட்டது. இந்த பருவத்தில் குறைவாக இருப்பதற்கான முக்கிய காரணம், முந்தைய கொள்முதல் பருவத்தை விட நெல் சாகுபடி பரப்பு குறைந்திருப்பதே என கழகம் விளக்கமளித்துள்ளது.
மாவட்ட அளவில் தேவையைப் பார்த்து நிலையங்களை திறக்க கலெக்டர்களுக்கு உத்தரவு வழங்கப்பட்டுள்ளதாகவும், விவசாயிகளுக்கு எந்த இடையூறும் இல்லாமல் கொள்முதல் நடைபெறவும், வாங்கிய நெல்லை உரிய காலத்தில் நகர்த்தவும் மண்டல அலுவலகங்கள் வழியாக கண்காணிப்பு அலுவலர்கள் நியமிக்கப்பட்டுள்ளதாகவும் தெரிவிக்கப்பட்டுள்ளது.
