2026ஆம் ஆண்டுக்கான டில்லி பல்கலைக்கழக மாணவர் சங்க (DUSU) தேர்தல் முடிவுகள் வெள்ளிக்கிழமை அறிவிக்கப்பட்டன. இதில் அகில பாரதிய வித்யார்த்தி பரிஷத் (ஏபிவிபி) தலைவர் பதவியை வென்று மீண்டும் கைப்பற்றியுள்ளது.
ஏபிவிபி வேட்பாளர் யாஷ் டபாஸ் 24,576 வாக்குகள் பெற்று சங்கத் தலைவராகத் தேர்ந்தெடுக்கப்பட்டார். பலத்த பாதுகாப்பு ஏற்பாடுகளுடன் நடந்த ஓட்டு எண்ணிக்கையில் பல சுற்றுகளில் முன்னணி நிலவரம் மாறியதாக தெரிவிக்கப்பட்டது.
துணைத் தலைவர் பதவியில் சுயேட்சையாக போட்டியிட்ட தீபான்சு ஷோகீன் வெற்றி பெற்றார். அவர் தேசிய மாணவர் சங்கம் (NSUI) சார்ந்த விஜய் மீனாவை தோற்கடித்து 30,634 வாக்குகள் பெற்றார்.
செயலாளர் மற்றும் இணைச் செயலாளர் பதவிகளிலும் ஏபிவிபி வெற்றி பெற்றுள்ளது. செயலாளர் பதவியில் ரியா சாவ்டி, NSUI வேட்பாளர் நம்ரதா சவுத்ரியை வீழ்த்தி வென்றார்; இணைச் செயலாளராக லக்ஷய ராஜ் சிங் தேர்ந்தெடுக்கப்பட்டார்.
முடிவுகள் அறிவிக்கப்பட்டதைத் தொடர்ந்து ஏபிவிபி உறுப்பினர்கள் மற்றும் ஆதரவாளர்கள் பட்டாசுகள் வெடித்தும் இனிப்புகள் வழங்கியும் கொண்டாடினர்.
