2026-27 நிதியாண்டின் ஏப்ரல் முதல் ஆகஸ்ட் வரை உள்ள முதல் ஐந்து மாதங்களில் தமிழக அரசின் வருவாய் ரூ.1 லட்சம் கோடியை கடந்துள்ளது. ஆனால் அதே காலத்தில் செலவு அதிகமாக இருந்ததால், ரூ.20,349 கோடி வருவாய் பற்றாக்குறை ஏற்பட்டுள்ளதாக விவரங்கள் தெரிவிக்கின்றன.
இந்த காலகட்டத்தில் அரசுக்கு கிடைத்த வருவாய் வரி வருவாய், வரி அல்லாத வருவாய் மற்றும் மத்திய அரசின் மானியங்கள் மூலம் வந்துள்ளது. மாநில ஜி.எஸ்.டி., முத்திரைத்தாள் மற்றும் பத்திரப்பதிவு கட்டணம், மாநில ஆயத்தீர்வை, மத்திய அரசின் வரி பங்கு உள்ளிட்டவை முக்கிய வரி ஆதாரங்களாக இருந்தன; சேவை கட்டணங்கள், அபராதங்கள் போன்றவை வரி அல்லாத வருவாயாக பதிவாகின.
செலவுப் பகுதியில் பணியாளர்கள் சம்பளம், ஓய்வூதியம், இலவச திட்டங்கள், மானியங்கள் போன்றவை முக்கியமாக இடம்பெற்றன. கடன்களுக்கு செலுத்தப்பட்ட வட்டி ரூ.25,991 கோடியாகவும், ஓய்வூதியச் செலவு ரூ.21,008 கோடியாகவும் இருந்ததாக கூறப்படுகிறது.
கடந்த ஐந்து மாதங்களில் அரசு ரூ.30,021 கோடி கடன் பெற்றுள்ளது. கடந்த மாதத்தில் கடன் வாங்கப்படவில்லை என்றும் தகவல் வெளியாகியுள்ளது.
முக்கிய வருவாய் தலைப்புகள் (ரூ.கோடியில்): மாநில ஜி.எஸ்.டி. 34,144.06; வர்த்தகம் மீதான வரி 28,164.79; மத்திய அரசின் வரி பங்கு 24,188; முத்திரைத்தாள்/பதிவு கட்டணம் 10,493.30; இதர வரிகள் மற்றும் தீர்வைகள் 6,843; மாநில ஆயத்தீர்வை 5,214; வரி அல்லாத வருவாய் 5,149; மத்திய மானியங்கள் 3,537. நிலம் விற்பனை வருவாய் 57.16 என குறிப்பிடப்பட்டுள்ளது.
