2011-ல் பதிவு செய்யப்பட்ட சொத்து குவிப்பு வழக்கில் இருந்து தன்னையும் குடும்பத்தினரையும் விடுவிக்க வேண்டும் என திமுக முன்னாள் அமைச்சர் எம்.ஆர்.கே. பன்னீர்செல்வம் தாக்கல் செய்த மனுவை சென்னை உயர் நீதிமன்றம் செப்.22 அன்று தள்ளுபடி செய்தது.
2006 முதல் 2011 வரை திமுக ஆட்சியில் அமைச்சராக இருந்த பன்னீர்செல்வம், வருமானத்துக்கு அதிகமாக சுமார் ரூ.3 கோடி மதிப்பிலான சொத்துகளை சேர்த்ததாக லஞ்ச ஒழிப்பு துறை வழக்கு பதிவு செய்துள்ளது.
இந்த வழக்கில் பன்னீர்செல்வம், அவரது மனைவி செந்தமிழ்செல்வி மற்றும் மகன் கதிரவன் ஆகியோரை கடலூர் நீதிமன்றம் முன்பு வழக்கில் இருந்து விடுவித்து உத்தரவிட்டிருந்தது. ஆனால் அந்த உத்தரவை சென்னை உயர் நீதிமன்றம் பின்னர் ரத்து செய்தது.
தொடர்ந்து தாக்கல் செய்யப்பட்ட புதிய மனு விசாரணைக்கு வந்தபோது, நீதிபதி லட்சுமிநாராயணன் விடுவிப்பு கோரிக்கையை நிராகரித்தார். மேலும், லஞ்ச ஒழிப்பு துறை சமர்ப்பித்துள்ள சாட்சியங்கள் மற்றும் ஆதாரங்களை அடிப்படையாக கொண்டு விசாரணையை தாமதமின்றி விரைந்து நடத்தி முடிக்க வேண்டும் என நீதிமன்றம் அறிவுறுத்தியது.
