தூதரகத்தின் புதிய அறிவுறுத்தல்
மலேசியாவில் உள்ள இந்திய தூதரகம், இந்தியர்கள் 30 நாள் விசா இல்லா நுழைவு வசதியை சுற்றுலா நோக்கத்திற்காக மட்டுமே பயன்படுத்த வேண்டும் என்றும், அதைப் பயன்படுத்தி வந்து வேலை தேடும் முயற்சிகளில் ஈடுபட வேண்டாம் என்றும் எச்சரித்துள்ளது.
சுற்றுலா நுழைவில் வேலை தேட முயற்சிகள் அதிகரிப்பு
அண்மைக்காலமாக இந்தியாவில் இருந்து பலர் சுற்றுலா விசா/சுற்றுலா நுழைவில் மலேசியா வந்து வேலை தேட முயல்வதாக தூதரகம் தெரிவித்தது. போலியான வேலைவாய்ப்பு முகவர்களின் ஆசைவார்த்தைகளை நம்பி சிலர் ஏமாறுவதுடன், முறையான ஆவணங்கள் இன்றி அங்கேயே தங்கும் நிலையும் உருவாகிறது எனவும் கூறப்பட்டது.
சட்டவிரோதமாக இருந்தால் கடும் நடவடிக்கை
முறையான அனுமதி இன்றி மலேசியாவில் தங்குவதும் பணிபுரிவதும் சட்டத்திற்கு விரோதம் என தூதரகம் வலியுறுத்தியது. சுற்றுலா நுழைவில் வந்து சட்டவிரோதமாக வேலை செய்தால் கைது, சிறைத்தண்டனை, அபராதம் போன்ற நடவடிக்கைகள் எடுக்கப்படலாம்; மேலும் மீண்டும் மலேசியாவுக்கு நுழைய தடை விதிக்கப்படலாம் என்றும் எச்சரித்தது.
பணி விசா மற்றும் பயண ஆவணங்கள் அவசியம்
மலேசியாவில் வேலை செய்ய விரும்புவோர் இந்தியாவிலிருந்து புறப்படும் முன்பே உரிய பணி விசா மற்றும் அனுமதி ஆவணங்களை பெற்றிருக்க வேண்டும் என தூதரகம் தெரிவித்தது. மேலும் விசா இல்லா 30 நாள் வசதி சுற்றுலாவுக்காக மட்டுமே என்பதையும் நினைவூட்டியது. பயணிகள் விமான டிக்கெட், ஹோட்டல் முன்பதிவு சான்று, வருகைக்கு 3 நாட்களுக்கு முன் ஆன்லைனில் சமர்ப்பிக்க வேண்டிய மலேசியா டிஜிட்டல் வருகை அட்டை, குறைந்தது 6 மாதங்கள் செல்லுபடியாகும் பாஸ்போர்ட் உள்ளிட்ட சட்டப்பூர்வ ஆவணங்களை கட்டாயம் வைத்திருக்க வேண்டும் என்றும் கூறியது.
