போர்கள், காலநிலை சார்ந்த பேரழிவுகள் மற்றும் உலகளாவிய நிச்சயமற்ற சூழல் நிலவும் நிலையில், நியூயார்க்கில் ஐக்கிய நாடுகள் சபையின் பொதுச்சபை உயர்மட்டக் கூட்டம் தொடங்கியுள்ளது. 130க்கும் மேற்பட்ட நாடுகளைச் சேர்ந்த தலைவர்கள், பிரதமர்கள், வெளியுறவுத்துறை அமைச்சர்கள் உள்ளிட்ட மூத்த பிரதிநிதிகள் இதில் பங்கேற்க நகரில் கூடிவருகின்றனர்.
ஐநா 81வது பொதுச்சபை அமர்வு செப்டம்பர் 8 முதல் நடைபெற்று வருகிறது. இந்தியாவின் சார்பில் வெளியுறவுத்துறை அமைச்சர் எஸ். ஜெய்சங்கர் தலைமையிலான குழு பங்கேற்றுள்ளது.
கூட்டத்தில் பேசிய அமெரிக்க அதிபர் டொனால்டு டிரம்ப், ஈரான் தொடர்பான பதற்றம் மற்றும் ரஷ்யா–உக்ரைன் போர் தொடர்வதாகக் குறிப்பிட்டு, இவை உலகளவில் பெரிய தாக்கத்தை ஏற்படுத்தியுள்ளதாக கூறினார். ஈரான் உலகின் முக்கிய பயங்கரவாத உற்பத்தி நாடாக இருப்பதாக அவர் குற்றம்சாட்டி, அந்த நாட்டை பொருளாதாரமும் ராணுவமும் வழியாக தனிமைப்படுத்த வேண்டும் என வலியுறுத்தினார்.
ஹார்முஸ் ஜலசந்தியில் சரக்குக் கப்பல்கள் தொடர்பான முடக்கம் நீங்கும் வரை, அணு ஆயுதத் தயாரிப்பை நிறுத்தும் வரை, பயங்கரவாதத்தை நிறுத்தும் வரை ஈரானுக்கு எதிராக உலக நாடுகள் ஒன்றிணைய வேண்டும் என்றும் அவர் கேட்டுக்கொண்டார். ஒப்பந்தம் செய்வதா அல்லது கடுமையான நடவடிக்கை எடுப்பதா என்ற தேர்வின் முன் தான் இருப்பதாகவும், இருப்பினும் ஈரானுக்கு அமைதியின் பாதைக்கு திரும்ப “கடைசி வாய்ப்பு” அளிக்கலாம் என்றும் தெரிவித்தார்.
மேலும், அமெரிக்காவில் நவம்பர் 3 அன்று இடைக்கால பார்லிமென்ட் தேர்தல் நடைபெற உள்ளதாகக் கூறிய டிரம்ப், தேர்தலுடன் இந்த விவகாரத்தை இணைக்க விரும்பவில்லை என்றார். ஆனால் தேர்தல் முடிந்த பின் ஈரானுடன் ஒப்பந்தம் ஏற்படும் என்ற நம்பிக்கை இருப்பதாகவும் அவர் தெரிவித்தார்.
