சென்னை: ஜெம் கிரானைட்ஸ் நிறுவன உரிமையாளர் வீரமணி மீது எழுந்த பாலியல் குற்றச்சாட்டு தொடர்பாக, இரண்டு ஆண்டுகளுக்கு முன்பே சென்னை போலீசிடம் தகவல் அளித்ததாக தமிழ்நாடு காங்கிரஸ் கமிட்டியின் ஆதிதிராவிடர் நலப் பிரிவு தலைவர் ரஞ்சன் குமார் தெரிவித்துள்ளார்.
அவரது கூறுகைப்படி, தற்போது வீரமணி (85) போக்சோ சட்டத்தின் கீழ் கைது செய்யப்பட்டு சென்னை புழல் சிறையில் அடைக்கப்பட்டுள்ளார். மேலும் வீரமணியின் நெருங்கிய தோழி சாந்தி (61), அவரது கணவர் மகேந்திர சிம்ஹன் (63) மற்றும் உதவியாளர் கணேசன் (55) ஆகியோரும் அதே சிறையில் அடைக்கப்பட்டுள்ளனர். விசாரணையில் முக்கிய ஆதாரமாக வீரமணியின் ரகசிய டைரி மற்றும் வீடியோக்கள் கைப்பற்றப்பட்டதாகவும், தொடர்புடைய இடங்களில் சோதனைகள் நடத்தப்பட்டதாகவும் தகவல் வெளியாகியுள்ளது.
ஆங்கில நாளிதழுக்கு அளித்த பேட்டியில் ரஞ்சன் குமார் கூறியதாவது: குற்றச்சாட்டுகள் குறித்து தகவல் கிடைத்ததும், 2024 நவம்பர் 22 அன்று அப்போது சென்னை தெற்கு கூடுதல் காவல் ஆணையராக இருந்த கண்ணனை நேரில் சந்தித்து எழுத்துப்பூர்வமாக புகார் அளித்தேன். மேலும், வீடியோ ஆதாரத்தின் ஸ்கிரீன்ஷாட்களையும் பின்னர் அந்த வீடியோ கிளிப்பையும் போலீசிடம் சமர்ப்பித்தேன் என்றார்.
ஆதாரங்களுடன் புகார் கொடுத்தபோதும், அப்போது வீரமணி மற்றும் சாந்தி மீது எந்த நடவடிக்கையும் எடுக்கப்படவில்லை என்றும், வீடியோவில் உள்ள பாதிக்கப்பட்டவர்கள் தமக்குத் தெரியுமா என்று பலமுறை கேட்கப்பட்டதாகவும் அவர் கூறினார். அவர்கள் தமக்குத் தெரியாதவர்கள் என்றாலும், விசாரணைக்கு அழைத்தோ அல்லது திடீர் சோதனை நடத்தியோ கூடுதல் ஆதாரங்களை மீட்க முடியும் என வலியுறுத்தியதாகவும், பின்னர் போலீசார் தன்னுடன் தொடர்பை மெல்ல மெல்ல நிறுத்திவிட்டதாகவும் தெரிவித்தார்.
மேலும், வீரமணி சாந்தியின் வீட்டிற்கு அடிக்கடி சென்று வந்ததாகவும், 14 முதல் 16 வயதுக்குட்பட்ட சிறுமிகள் பாலியல் ரீதியாகத் துன்புறுத்தப்பட்டதாகவும் அவர் குற்றம்சாட்டினார். பாதிக்கப்பட்டவர்களுக்கு நீதி கிடைப்பதை உறுதிசெய்ய போலீசாருக்கு முழுமையாக ஒத்துழைக்கத் தயாராக இருப்பதாகவும் ரஞ்சன் குமார் கூறினார்.
