தமிழ்நாடு சட்டசபை நடவடிக்கைகள் குறித்து நீதிமன்றம் கேள்வி எழுப்ப முடியாது என்று சென்னை உயர் நீதிமன்றம் அரசியல் சாசன விதிகளை மேற்கோள் காட்டி தெரிவித்துள்ளது.
காவிரி ஆற்றின் குறுக்கே மேகதாதுவில் அணை கட்டும் கர்நாடக அரசுக்கு எதிராக, கடந்த ஜூன் 19 அன்று தமிழக சட்டசபையில் தீர்மானம் நிறைவேற்றப்பட்டது. அப்போது எதிர்க்கட்சி தலைவர் உதயநிதியின் கோரிக்கையை ஏற்று, மேகதாது அணை விவகாரத்தில் நடுவர் மன்றம் அமைக்க வேண்டும் என்ற திருத்தம் தீர்மானத்தில் சேர்க்கப்பட்டது. இதற்கு அதிமுக, பாமக உள்ளிட்ட கட்சிகள் எதிர்ப்பு தெரிவித்தன.
இந்த திருத்தத்தை எதிர்த்து அதிமுக கொறடா அக்ரி கிருஷ்ணமூர்த்தி தாக்கல் செய்த மனுவை, தலைமை நீதிபதி எஸ்.ஏ. தர்மாதிகாரி மற்றும் நீதிபதி ஜி. அருள்முருகன் ஆகியோர் அடங்கிய அமர்வு விசாரித்தது. அரசியல் சாசனத்தின் 212(1) பிரிவின்படி சட்டசபை நடைமுறைகள் குறித்து நீதிமன்றத்தில் கேள்வி எழுப்ப முடியாது என்றும், 194வது பிரிவு சட்டசபையில் உறுப்பினர்கள் பேசும் கருத்துகளுக்கு சட்டப் பாதுகாப்பு அளிக்கிறது என்றும் அமர்வு குறிப்பிட்டது.
மேலும், சட்டசபை நடைமுறைகள் தொடர்பான கேள்விகளில் முடிவெடுக்க சபாநாயகருக்கு முழு அதிகாரம் இருப்பதாகவும், எதிர்க்கட்சி தலைவர் தெரிவித்த கருத்தை தீர்மானத்தில் சேர்த்தது சபாநாயகரின் அதிகார வரம்புக்குள் வருவதாகவும் நீதிமன்றம் கூறியது. இதன் அடிப்படையில் மனு விசாரணைக்கு உகந்ததல்ல எனக் கருதி, மனுவை தள்ளுபடி செய்தது.
