திரிணமுல் காங்கிரஸ் (டிஎம்சி) கட்சியிலிருந்து பிரிந்து சென்ற 20 எம்.பி.க்களை தகுதி நீக்கம் செய்ய கோரும் மனுக்களில், லோக்சபா சபாநாயகர் ஓம் பிர்லா இதுவரை முடிவு எடுக்காததை உச்சநீதிமன்றம் செவ்வாய்க்கிழமை கவலையுடன் சுட்டிக்காட்டியது. இத்தகைய மனுக்களில் மூன்று மாத தாமதம் என்பது ‘சிவப்பு எச்சரிக்கை மணி’ எனவும் நீதிமன்றம் குறிப்பிட்டது.
வழக்கு விவரங்களின்படி, மேற்கு வங்கத்தில் ஏற்பட்ட அரசியல் மாற்றங்களின் பின்னணியில் டிஎம்சிக்குள் உட்கட்சி பூசல் தீவிரமடைந்தது. லோக்சபாவில் உள்ள 28 எம்.பி.க்களில் 20 பேர், கட்சியின் கொறடா பதவியில் இருந்து நீக்கப்பட்ட ககோலி கோஷ் தஸ்திதார் தலைமையில் ஒருங்கிணைந்து, இந்திய தேசியவாத குடிமக்கள் கட்சியில் இணைந்ததாக தெரிவிக்கப்பட்டது.
கட்சி தாவல் தடைச் சட்டத்தின் கீழ் பாதுகாப்பு கோரி, மூன்றில் இரு பங்கு எம்.பி.க்கள் புதிய கட்சியில் இணைந்ததாக சபாநாயகருக்கு முறைப்படி கடிதமும் அளிக்கப்பட்டதாக கூறப்பட்டது. இதைத் தொடர்ந்து, அந்த 20 எம்.பி.க்களையும் தகுதி நீக்கம் செய்ய வேண்டும் என டிஎம்சி சார்பில் சபாநாயகரிடம் மனுக்கள் தாக்கல் செய்யப்பட்டன.
இந்த மனுக்களில் முடிவு எடுக்க உரிய உத்தரவு பிறப்பிக்க வேண்டும் என டிஎம்சி உச்சநீதிமன்றத்தை அணுகியது. தலைமை நீதிபதி சூர்யகாந்த், நீதிபதி ஜாய்மால்யா பக்சி மற்றும் நீதிபதி வி.மோகனா ஆகியோர் அடங்கிய அமர்வு வழக்கை விசாரித்தது.
டிஎம்சி சார்பில் மூத்த வழக்கறிஞர் கல்யாண் பானர்ஜி மற்றும் மத்திய அரசு சார்பில் சொலிசிட்டர் ஜெனரல் துஷார் மேத்தா வாதங்களை முன்வைத்தனர். சபாநாயகர் அரசியலமைப்புச் சட்டத்தின்படி தன் கடமையை விரைந்து நிறைவேற்ற வேண்டும் எனக் கூறிய நீதிமன்றம், சபாநாயகரின் சுயசார்பு மற்றும் அதிகார வரம்பைக் கருத்தில் கொண்டு காலக்கெடு விதிக்க முடியாது என்றும் தெரிவித்தது. வழக்கு விசாரணை ஆறு வாரங்களுக்கு ஒத்திவைக்கப்பட்டது.
