சென்னை போலீஸ் விசாரணையில், ‘ஜெம் கிரானைட்ஸ்’ வீரமணியின் நெருங்கிய தோழி சாந்தி, ஆபாச வீடியோக்களை வெளியிடுவதாக மிரட்டி பணம் பறித்ததாக தெரிய வந்துள்ளதாக அதிகாரிகள் தெரிவித்தனர்.
விசாரணை விவரங்களின்படி, சாந்தி மற்றும் அவரது கணவர் மகேந்திர சிம்ஹன் தங்குவதற்காக தேனாம்பேட்டையில் ஒரு சொகுசு பங்களாவை வாடகைக்கு எடுத்துக் கொடுத்ததாகவும், சாந்தியிடம் வீரமணி அதிக நம்பிக்கை வைத்திருந்ததாகவும் போலீஸ் கூறியது. மேலும், கல்வி உதவி செய்வது போல சில சிறுமியரை அணுகி, வீரமணியின் தவறான செயல்களுக்கு வழிவகுத்ததாகவும் குற்றச்சாட்டு பதிவு செய்யப்பட்டுள்ளதாக தெரிவித்தனர்.
பணம் கொடுப்பதை வீரமணி நிறுத்திய பின்னர், தன்னிடம் உள்ள சல்லாப/ஆபாச வீடியோக்களை வெளியிடுவேன் என சாந்தி மிரட்டத் தொடங்கியதாக போலீஸ் தரப்பு கூறியது.
இந்த பிரச்னையால் சென்னை ஈ.சி.ஆர் பகுதியில் வாங்கியிருந்த சுமார் ரூ.100 கோடி மதிப்புள்ள நிலத்தை ரூ.70 கோடிக்கு விற்கும் நிலைக்கு வீரமணி தள்ளப்பட்டதாகவும், அந்த நில விவகாரத்தில் தொடர்புடைய ஒரு வழக்கறிஞர் சாந்தியிடம் பேசி விவகாரத்திலிருந்து விலகுமாறு கூறியதாகவும் அதிகாரிகள் தெரிவித்தனர்.
மேலும், இந்த விவகாரத்தில் தமிழக காங்கிரஸ் நிர்வாகி ரஞ்சன்குமார் மற்றும் தமிழக மக்கள் முன்னேற்ற கழக தலைவர் ஜான்பாண்டியன் ஆகியோரின் உதவியை வீரமணி நாடியதாகவும், குற்றச்சாட்டுகளை மூடி மறைக்க பண பரிவர்த்தனை நடந்ததா, தென்மாவட்ட அரசியல் புள்ளி ஒருவர் ஆதரவாக செயல்பட்டாரா என்பதையும் விசாரித்து வருவதாக போலீஸ் தெரிவித்தது.
