மதுவிலக்கு 1990 முதல் அமலில் உள்ள நாகலாந்தில், கடந்த இரண்டு நாட்களில் சந்தேகத்திற்குரிய கள்ளச்சாராயம் அருந்திய 19 பேர் உயிரிழந்த சம்பவம் பெரும் அதிர்ச்சியை ஏற்படுத்தியுள்ளது.
அதிகாரிகள் கூறுகையில், துயென்சாங் மாவட்டத்தில் 11 பேரும், மொகோக்சுங் மாவட்டத்தில் 8 பேரும் உயிரிழந்துள்ளனர். இந்த சம்பவத்தை விசாரிக்க சிறப்பு விசாரணை குழு (SIT) அமைக்கப்பட்டுள்ளது.
மாநிலம் முழுவதும் நடத்தப்பட்ட அதிரடி சோதனைகளில் 19 பேர் கைது செய்யப்பட்டதாகவும், அவர்களிடமிருந்து சுமார் 3,000 மது பாட்டில்கள் பறிமுதல் செய்யப்பட்டதாகவும் போலீசார் தெரிவித்தனர். உயிரிழப்புக்கான காரணத்தை உறுதிப்படுத்த மாதிரிகள் குவஹாத்தி தடய அறிவியல் ஆய்வகத்திற்கு அனுப்பப்பட்டுள்ளன.
அடையாளம் தெரியாத அல்லது லேபிள் இல்லாத மதுபானங்களை அருந்த வேண்டாம் என போலீசார் எச்சரித்துள்ளனர். தலைச்சுற்றல், மங்கலான பார்வை, மூச்சுத்திணறல், மயக்கம் போன்ற அறிகுறிகள் இருந்தால் உடனடியாக மருத்துவ உதவி பெறவும் அறிவுறுத்தப்பட்டுள்ளது.
