கொச்சி: கேரளாவின் திருப்புனித்துரா அரசு சமஸ்கிருத கல்லூரியில் நடைபெற்ற மாணவர் சங்கத் தேர்தலில் ஏபிவிபி (ABVP) 12 பதவிகளையும் கைப்பற்றி குறிப்பிடத்தக்க வெற்றியை பெற்றுள்ளது.
இந்த கல்லூரி மாணவர் சங்கம் கடந்த சுமார் 45 ஆண்டுகளாக இடதுசாரி ஆதரவு கொண்ட எஸ்எப்ஐ (SFI) கட்டுப்பாட்டில் இருந்ததாக தெரிவிக்கப்படுகிறது. இம்முறை 12 இடங்களுக்கான தேர்தலில் ஏபிவிபி வேட்பாளர்கள் முழுமையாக வெற்றி பெற்றுள்ளனர்.
செய்தி விவரப்படி, செப்டம்பர் 17 வேட்புமனுத் தாக்கலுக்கான கடைசி நாளாக இருந்த நிலையில், ஏபிவிபி சார்பில் மட்டுமே வேட்புமனுக்கள் தாக்கல் செய்யப்பட்டன. இதனால் போட்டியின்றி அனைவரும் தேர்வு செய்யப்பட்டனர். ஸ்னிக்தா எம். ஹரி தலைவர், ஆதித்யா டி.ஏ. துணைத் தலைவர், விக்னேஷ் பட் பொதுச் செயலாளர் என அறிவிக்கப்பட்டுள்ளது.
ஆனால், மகாத்மா காந்தி பல்கலைக்கழகத்தின் கீழ் இயங்கும் கல்லூரிகளுக்கான மாணவர் சங்கத் தேர்தல்கள் நடைபெறவுள்ள செப்டம்பர் 29 அன்று தான் இந்த வெற்றிக்கான அதிகாரப்பூர்வ அறிவிப்பு வெளியிடப்படும் என கூறப்படுகிறது.
திருப்புனித்துரா நகராட்சியை பாஜ அண்மையில் கைப்பற்றிய பின்னணியில், அதே பகுதியில் உள்ள அரசு சமஸ்கிருத கல்லூரியிலும் பாஜவின் மாணவர் அமைப்பான ஏபிவிபி வெற்றி பெற்றது கவனம் பெற்றுள்ளது. எஸ்எப்ஐயின் கொள்கைகள் மற்றும் சமஸ்கிருதத்தை மேம்படுத்துவதில் ஏற்பட்ட தோல்வி உள்ளிட்ட காரணங்களால் இந்த மாற்றம் ஏற்பட்டதாக ஏபிவிபி தெரிவித்ததாக செய்தி கூறுகிறது. மேலும் பஞ்சாப் மற்றும் டில்லியில் நடைபெற்ற மாணவர் சங்கத் தேர்தல்களிலும் ஏபிவிபி வெற்றி பெற்றதாகவும் குறிப்பிடப்பட்டுள்ளது.
