அ.தி.மு.க. பொதுச்செயலாளர் எடப்பாடி கே. பழனிசாமி (இபிஎஸ்), ‘ஜெம்’ வீரமணி வழக்கை முன்வைத்து முதல்வர் விஜய் அரசியல் ஆதாயம் தேடுகிறார் என்று குற்றம்சாட்டினார். மதுராந்தகத்தில் செய்தியாளர்களிடம் பேசிய அவர், போக்சோ சட்டத்தின் கீழ் வீரமணி தன் உத்தரவின் பேரில் கைது செய்யப்பட்டதாக முதல்வர் கூறியது தவறு என்றார்.
இந்த வழக்கு தி.மு.க. ஆட்சிக்காலத்தில் பதிவு செய்யப்பட்டதாகவும், அப்போது போதிய ஆதாரம் இல்லை என்பதால் வழக்கை முடிக்க வேண்டும் என்று நீதிமன்றத்தில் தெரிவிக்கப்பட்டதாகவும், ஆனால் நீதிபதி அதை ஏற்கவில்லை என்றும் இபிஎஸ் கூறினார். த.வெ.க. அரசு பொறுப்பேற்ற பின் வழக்கு மீண்டும் நீதிமன்றத்தில் வந்ததாகவும் அவர் குறிப்பிட்டார்.
நீதிபதி இறுதி அறிக்கையை நான்கு வாரங்களில் தாக்கல் செய்ய உத்தரவிட்டும் போலீசார் வாய்தா கேட்டதாக இபிஎஸ் குற்றம்சாட்டினார். ஆக. 20-ல் வழக்கு வந்தபோதும் இறுதி அறிக்கை தாக்கல் செய்யாமல் மீண்டும் கால அவகாசம் கேட்டதாகவும், ஆக. 27-ல் தடயவியல் துறை அறிக்கை நிலுவையில் இருப்பதாக போலீசார் தெரிவித்ததாகவும் அவர் கூறினார்.
இந்த தாமதங்களால் நீதிமன்றம் கைது உத்தரவு பிறப்பித்ததாகவும், அதன்படியே வீரமணி கைது செய்யப்பட்டதாகவும் இபிஎஸ் தெரிவித்தார். அரசு மூன்று மாதங்கள் வழக்கை இழுத்தடித்ததாக கூறிய அவர், அமைச்சர்கள் வெங்கடரமணன், லோகேஷ் பங்கேற்ற நிகழ்ச்சியில் வீரமணி கலந்து கொண்டதாகவும், அமைச்சர் லோகேஷ் அவரை குடும்ப நண்பர் என அறிமுகம் செய்ததாகவும் குறிப்பிட்டார்.
மேலும், த.வெ.க. அரசு வந்த பின் 250 கொலைகள், 300 பாலியல் வன்கொடுமை சம்பவங்கள் நடந்துள்ளதாகவும், இதற்கு முதல்வர் என்ன பதில் சொல்லப் போகிறார் எனவும் இபிஎஸ் கேள்வி எழுப்பினார். தற்போதைய ஆட்சியில் குற்றச்செயலில் ஈடுபடுவோருக்கு அச்சமே இல்லை என்றும் அவர் கூறினார்.
