நியூயார்க் நகரில் நடைபெறும் ஐநா 81வது பொதுச் சபை கூட்டத்தின் பின்னணியில், ஐநா பாதுகாப்பு கவுன்சிலில் (UNSC) இந்தியா நிரந்தர உறுப்பினராகும் நீண்டகால முயற்சிக்கு ஆதரவு அதிகரித்து வருகிறது.
ஐநா நிகழ்வுகளின் ஓரமாக, மத்திய ஐரோப்பிய நாடுகளின் கூட்டமைப்பான ‘வி4’ (விசெகிரேடு) அமைப்பு தனியாக ஒரு கூட்டத்தை நடத்தியது. போலந்து, ஹங்கேரி, ஸ்லோவாக்கியா மற்றும் செக் குடியரசு ஆகிய நாடுகள் இதில் இடம்பெறுகின்றன. இந்த கூட்டத்தில் பங்கேற்க இந்தியாவுக்கும் அழைப்பு விடுக்கப்பட்டது.
வி4 நாடுகளின் துணை பிரதமர்கள் மற்றும் வெளியுறவு அமைச்சர்களுடன், இந்திய வெளியுறவு அமைச்சர் எஸ். ஜெய்சங்கர் பேச்சுவார்த்தை நடத்தினார். ஐநா பாதுகாப்பு கவுன்சிலில் இந்தியா நிரந்தர இடம் பெறும் முயற்சிக்கு வி4 அமைப்பு ஆதரவு தெரிவித்ததாக கூறப்பட்டுள்ளது.
இதனிடையே, ஐநா பொதுச் சபையில் உரையாற்றிய ரஷ்ய வெளியுறவு அமைச்சர் செர்ஜி லாவ்ரோவ், இந்தியாவின் நிரந்தர இட முயற்சிக்கு ரஷ்யா ஆதரவு அளிப்பதாக மீண்டும் தெரிவித்தார். மேற்கத்திய நாடுகளுக்கான நிரந்தர உறுப்பினர் தகுதியை விரிவுபடுத்துவதற்கு எதிர்ப்பு தெரிவித்த அவர், ஆசியா மற்றும் ஆப்ரிக்காவின் பிரதிநிதித்துவம் அதிகரிக்க வேண்டும் என்றும் கூறினார்.
மேலும், ஐநா பாதுகாப்பு கவுன்சிலில் இந்தியா நிரந்தர உறுப்பினராகும் முயற்சிக்கு போர்ச்சுகல் மற்றும் மொரிஷியஸ் நாடுகளும் ஆதரவு தெரிவித்துள்ளதாக செய்தியில் குறிப்பிடப்பட்டுள்ளது.
