கேரள மாநிலம் கொல்லம் மாவட்டம் அமிர்தாபுரியில் உள்ள மாதா அமிர்தானந்தமயி மடத்தில், மாதா அமிர்தானந்தமயி தேவியின் 73வது பிறந்தநாளை முன்னிட்டு நடைபெற்ற ‘விஸ்வ சேவா தின’ கொண்டாட்டங்களில் துணை ஜனாதிபதி சி.பி. ராதாகிருஷ்ணன் கலந்து கொண்டார்.
அவர் செப்.27 அன்று ஒரு நாள் அரசு முறைப் பயணமாக கேரளா வந்தார். விமான நிலையத்தில் கேரள ஆளுநர் ராஜேந்திர விஸ்வநாத் அர்லேகர், மத்திய அமைச்சர் கிஞ்சராபு ராம் மோகன் நாயுடு, மாநில அமைச்சர்கள் மற்றும் சசி தரூர் எம்.பி. உள்ளிட்டோர் வரவேற்றனர்.
விழாவில் மடத்தின் பல புதிய மனிதநேயத் திட்டங்களை துணை ஜனாதிபதி தொடங்கி வைத்தார். நேபாளத்தில் ஏற்பட்ட வெள்ள பாதிப்புகளுக்கான நிவாரண உதவியாக ரூ.2 கோடியை இந்தியாவுக்கான நேபாளத் தூதர் டாக்டர் சுரேந்திர தாப்பாவிடம் வழங்கினார்.
மேலும், ஏழை எளிய மக்களுக்கு இலவச மருத்துவச் சேவைகள்—உறுப்பு மாற்று அறுவை சிகிச்சைகள் உள்ளிட்டவை—வழங்கும் ஏற்பாடுகள் அறிவிக்கப்பட்டன. நீண்டகரை மற்றும் முதலாபொழி பகுதிகளில் நடந்த படகு விபத்துகளில் உயிரிழந்த மீனவர்களின் குடும்பங்களுக்கு நிதியுதவியும் வழங்கப்பட்டது.
மடத்தின் முக்கியத் திட்டங்களான ‘அமிர்தாஸ்ரீ’ சுயஉதவிக் குழுக்கள் மற்றும் ‘அமிர்தா செர்வ்’ சுயசார்புக் கிராமத் திட்டங்களுக்கு தொடர்ந்த ஆதரவும் அறிவிக்கப்பட்டது. மொத்தமாக ரூ.50 கோடி மதிப்பிலான மக்கள் நல மற்றும் சமூகச் சேவைத் திட்டங்கள் அறிவிக்கப்பட்ட நிலையில், இந்தியா மற்றும் இலங்கையில் 50,000 வீடுகள் கட்டி முடிக்கப்பட்டதை குறிக்கும் ‘அமிர்தகுடீரம்’ திட்டத்தின் 30வது ஆண்டு விழா மலரையும், ‘ஹனுமான் சாலிசா’, ‘தி ஓஷன் ஆஃப் கிரேஸ்’, ‘சத்யம் சிவம் சுந்தரம்’ ஆகிய மூன்று புதிய வெளியீடுகளையும் துணை ஜனாதிபதி வெளியிட்டார்.
