தேர்தல் ஆணையத்தின் செயல்பாடுகள் குறித்து சமீபத்தில் வெளியான ஊடகச் செய்திகள் அரசியல் வட்டாரங்களில் பரபரப்பை ஏற்படுத்தியுள்ளன. இதைத் தொடர்ந்து சில கட்சிகள், தலைமை தேர்தல் ஆணையர் ஞானேஷ்குமார் பதவி விலக வேண்டும் எனக் கோரி, போராட்டங்களையும் அறிவித்துள்ளன. கடந்த 15 மாதங்களாக நடைபெறும் வாக்காளர் பட்டியல் தீவிர திருத்தப் பணியை சட்டவிரோதம் எனவும் விமர்சிக்கின்றன.

விமர்சனங்களின் மையமாக, உரிய நடைமுறைகளைப் பின்பற்றாமல் சர்ச்சைக்குரிய முடிவுகள் எடுக்கப்பட்டதாகவும், மற்ற தேர்தல் ஆணையர்களுடன் போதிய ஆலோசனை இன்றி தலைமை தேர்தல் ஆணையர் தன்னிச்சையாக செயல்பட்டதாகவும் கூறப்படும் புகார்கள் உள்ளன. கடந்த 10 மாதங்களில் தேர்தல் ஆணையர்களான சுக்பீர் சிங் சாந்து மற்றும் விவேக் ஜோஷி ஆகியோர் குறைந்தது 14 முறை அதிகாரப்பூர்வமாக மாறுபட்ட கருத்துகளை பதிவு செய்ததாகவும், ஒரே நாளில் நான்கு கருத்துகள் பதிவு செய்யப்பட்டதாகவும் தெரிவிக்கப்படுகிறது.

இதற்கு தேர்தல் ஆணையம் அளித்த விளக்கத்தில், பல உறுப்பினர்கள் கொண்ட அமைப்பில் விவாதங்களின் போது கருத்து வேறுபாடுகள் எழுவது இயல்பானது என கூறியுள்ளது. மேலும், தலைமை தேர்தல் ஆணையர் மற்றும் இதர தேர்தல் ஆணையர்கள் சட்டம்–2023ன் கீழ், ஆணையத்தின் அனைத்து உத்தரவுகளும் முழு சட்டப்பூர்வ அதிகாரத்துடனே பிறப்பிக்கப்படுகின்றன என தெரிவித்துள்ளது.

இந்த விவகாரத்தை விளக்குவதற்காக, ஆணையத்தில் முன்பும் ஏற்பட்ட கருத்து மோதல்கள் நினைவூட்டப்படுகின்றன. 1993ல் மூன்று உறுப்பினர்கள் கொண்ட ஆணையமாக மாற்றப்பட்ட பிறகு, அப்போது தலைமை தேர்தல் ஆணையராக இருந்த டி.என். சேஷன் மற்றும் தேர்தல் ஆணையர்கள் எம்.எஸ். கில், ஜி.வி.ஜி. கிருஷ்ண மூர்த்தி ஆகியோருக்கு இடையே மோதல் ஏற்பட்டது; உச்ச நீதிமன்றம் நியமனங்களை உறுதி செய்து, கொள்கை முடிவுகளில் மூவருக்கும் சம அந்தஸ்து இருப்பதாகத் தெளிவுபடுத்தியது.

மேலும், 2009ல் தலைமை தேர்தல் ஆணையர் என். கோபாலசுவாமி, தேர்தல் ஆணையர் நவீன் சாவ்லாவை நீக்குமாறு ஜனாதிபதிக்கு கடிதம் எழுதிய நிகழ்வு, 2019ல் பிரதமர் நரேந்திர மோடி மற்றும் அப்போது பா.ஜ. தலைவர் அமித் ஷா தொடர்பான புகார்களில் பெரும்பான்மை முடிவுக்கு எதிராக தேர்தல் ஆணையர் அசோக் லவாசா மாறுபட்ட கருத்தை பதிவு செய்த நிகழ்வு ஆகியவையும் குறிப்பிடப்படுகின்றன. இவற்றின் பின்னணியில், ஆலோசனைகளில் கருத்து வேறுபாடு இயல்பானது; அதை அரசியலாக்கி ஆதாயம் தேடுவது சரியல்ல என கட்டுரை வலியுறுத்துகிறது.