சென்னை: அ.தி.மு.க.வில் இருந்து த.வெ.க. (தமிழக வெற்றி கழகம்) கட்சிக்கு வந்தவர்களுக்கு முக்கிய பதவிகளும் தொகுதி பொறுப்புகளும் வழங்கப்படுவது, கட்சியின் சில நிர்வாகிகளிடையே கடும் அதிருப்தியை ஏற்படுத்தியுள்ளதாக மாவட்ட செயலர்கள் சிலர் தெரிவித்துள்ளனர்.
அவர்கள் கூறுகையில், திருப்பூர் தெற்கு மாவட்ட செயலர் திருமலை பொறுப்பில் முன்பு உடுமலைப்பேட்டை மற்றும் மடத்துக்குளம் ஆகிய இரண்டு தொகுதிகள் இருந்ததாகவும், தற்போது மடத்துக்குளம் முன்னாள் அ.தி.மு.க. எம்.எல்.ஏ. மகேந்திரனுக்கும், உடுமலைப்பேட்டை முன்னாள் அமைச்சர் ராதாகிருஷ்ணனுக்கும் ஒதுக்கப்பட்டதால் திருமலைக்கு அதிகாரம் குறைந்துவிட்டதாகவும் தெரிவித்தனர்.
மேலும், திருப்பூர் வடக்கு தொகுதி (எம்.எல்.ஏ. சத்தியபாமா) முன்னாள் அமைச்சர் ஆனந்தன் வசம் சென்றதாகவும், த.வெ.க. அமைச்சர் ராஜ்குமாரின் கடலூர் தொகுதி முன்னாள் அமைச்சர் சம்பத் வசமாகியுள்ளதாகவும் அவர்கள் கூறினர். அ.தி.மு.க. முன்னாள் தலைவர்களுக்கு ஒதுக்கப்பட்ட தொகுதிகளை இனி அவர்கள் பார்த்துக்கொள்ள வேண்டும் என்ற உத்தரவு தலைமையிலிருந்து வந்ததாகவும் தெரிவித்தனர்.
அ.தி.மு.க.வில் இருந்து வந்தவர்களுக்கு துணை பொதுச்செயலர் பதவி வழங்கியதை ஏற்றுக்கொள்ளலாம் என்றாலும், தொகுதிகளையும் தாரைவார்ப்பதை ஏற்க முடியாது என அவர்கள் வலியுறுத்தினர். முன்பே எம்.எல்.ஏ. பதவியை ராஜினாமா செய்துவிட்டு வந்தவர்களுக்கும், பிற கட்சிகளில் இருந்து வந்து த.வெ.க.வில் எம்.எல்.ஏ. ஆன 27 பேருக்கும் அந்தந்த தொகுதிகளை தலைமையே ஒதுக்கியதால், ரசிகர் மன்ற பின்னணியில் இருந்து வந்த 10க்கும் மேற்பட்ட மாவட்ட செயலர்கள் பதவிகளை இழந்ததாகவும் கூறினர்.
புதிதாக வந்தவர்களுக்கு தொடர்ந்து பதவிகள் வழங்கப்பட்டால் கட்சிக்காக உழைத்தவர்கள் எங்கே செல்வது என்ற கேள்வியை அவர்கள் எழுப்பினர். இது குறித்து பொதுச்செயலர் ஆனந்திடம் கேட்டபோது, ‘பொறுமையாக இருங்கள்’ என்று மட்டும் கூறியதாகவும் தெரிவித்தனர்.
