நிலுவையில் உள்ள தேர்தல் வழக்குகள் குறித்து சென்னை உயர் நீதிமன்றம் தீர்ப்பளித்த பின், ஐந்து சட்டமன்றத் தொகுதிகளுக்கான இடைத்தேர்தல் நடத்தப்படும் என்று இந்திய தேர்தல் ஆணையம் (ECI) நீதிமன்றத்தில் தெரிவித்துள்ளது.
திருச்சி கிழக்கு, கரூர், விராலிமலை, பெருந்துறை, அம்பாசமுத்திரம் ஆகிய தொகுதிகளுக்கான தேர்தல் வழக்குகள் நிலுவையில் இருப்பதை காரணமாகக் கொண்டு, இடைத்தேர்தல் அறிவிப்பதற்கு உயர் நீதிமன்றம் முன்பு தடை விதித்திருந்தது. அந்தத் தடையை நீக்கக் கோரி முதல்வர் விஜய் உள்ளிட்டோர் மனுக்கள் தாக்கல் செய்த நிலையில், தலைமை நீதிபதி தர்மாதிகாரி மற்றும் நீதிபதி அருள்முருகன் அமர்வு முன் வழக்கு மீண்டும் விசாரணைக்கு வந்தது.
தேர்தல் ஆணையம் தரப்பில், இடைத்தேர்தலை அறிவிக்காதது நிரந்தர முடிவு அல்ல என்றும், வழக்குகள் முடிந்ததும் தேர்தல் நடத்தப்படும் என்றும் தெரிவிக்கப்பட்டது. பெருந்துறை தொகுதி தொடர்பான தேர்தல் வழக்கு நிராகரிக்கப்பட்டிருந்தாலும், மேல்முறையீடு செய்ய நவம்பர் 24 வரை அவகாசம் இருப்பதால், சட்டப்படி முடிவு எடுக்க அனுமதி வழங்க வேண்டும் என்றும் கோரப்பட்டது.
மேலும், மக்கள் பிரதிநிதித்துவச் சட்டப்படி தொகுதி காலியானதாக அறிவிக்கப்பட்ட உடனே தேர்தல் நடத்த வேண்டும் என்ற கட்டாயம் இல்லை; ஆறு மாத அவகாசம் வழங்கப்பட்டுள்ளது எனவும் ஆணையம் குறிப்பிட்டது. ஒவ்வொரு தொகுதிக்கும் மக்கள் பிரதிநிதி தேவை என்பதை ஏற்றுக்கொண்டாலும், உடனடியாக இடைத்தேர்தல் நடத்துமாறு ஆணையத்துக்கு உத்தரவிட வேண்டும் என்ற கோரிக்கையை நிராகரிக்க வேண்டும் என்றும் வலியுறுத்தியது. தேர்தல் ஆணையத்தின் மேலதிக வாதங்களுக்காக விசாரணை ஒத்திவைக்கப்பட்டது.
