லட்சத்தீவுக்கு மேற்கே அரபிக்கடலில், ஈரான் படகில் இருந்து சுமார் ரூ.3,000 கோடி மதிப்பிலான போதைப்பொருள் பறிமுதல் செய்யப்பட்டுள்ளதாக அதிகாரிகள் தெரிவித்தனர். உளவுத்துறை தகவலின் அடிப்படையில் இந்திய கடலோர காவல் படை மற்றும் குஜராத் பயங்கரவாத தடுப்புப் பிரிவு (ஏடிஎஸ்) இணைந்து இந்த நடவடிக்கையை மேற்கொண்டன.
சோதனையில் 526 கிலோ உயர்தர ஹெராயின் மற்றும் மெத்தபெட்டமைன் கைப்பற்றப்பட்டதாக கூறப்படுகிறது. சம்பவம் தொடர்பாக படகில் இருந்த குழுவினரான 5 பாகிஸ்தானியர்கள் கைது செய்யப்பட்டனர்.
பறிமுதல் செய்யப்பட்ட போதைப்பொருள் மூட்டைகள், ஈரான் படகு மற்றும் கைது செய்யப்பட்டவர்கள் அனைத்தும் ஆயுதமேந்திய பாதுகாப்புடன் மும்பைக்கு கொண்டு வரப்பட்டதாக அதிகாரிகள் தெரிவித்தனர். இதன் மூலம் சர்வதேச போதைப்பொருள் கடத்தல் முயற்சி முறியடிக்கப்பட்டதாகவும் கூறினர்.
இந்த கூட்டு நடவடிக்கை இந்திய எல்லைக்குள் போதைப்பொருள் நுழைவதைத் தடுக்க உதவியாக அமைந்துள்ளதாக அதிகாரிகள் தெரிவித்தனர். கைது செய்யப்பட்டவர்களிடம் தொடர்ந்து விசாரணை நடைபெற்று வருகிறது.
