ஐக்கிய அரபு எமிரேட்ஸைச் சேர்ந்த ‘பிளை துபாய்’ விமானத்தில் நடந்ததாக கூறப்படும் பெரிய பயங்கரவாத தாக்குதல் முயற்சியை முறியடித்த இந்திய விமானி கேப்டன் ஸ்மித் மச்சாருக்கு உலகளாவிய புகழாரம் குவிகிறது. பிரதமர் நரேந்திர மோடி, அமெரிக்க அதிபர் டொனால்டு டிரம்ப், இஸ்ரேல் பிரதமர் பெஞ்சமின் நெதன்யாகு உள்ளிட்ட தலைவர்கள் அவரது நடவடிக்கையை வெளிப்படையாக பாராட்டியுள்ளனர்.
தகவலின்படி, துபாயிலிருந்து டெல்அவிவ் நோக்கி புறப்பட்ட அந்த விமானத்தில் 174 பயணிகள் உட்பட 180 பேர் இருந்தனர். நடுவானில், ஓமனைச் சேர்ந்த துணை விமானி கேப்டன் மச்சாரை தாக்கி விமானத்தின் கட்டுப்பாட்டை கைப்பற்ற முயன்றதாகவும், இஸ்ரேலில் உள்ள கட்டடங்கள் மீது விமானத்தை மோத வைக்க திட்டமிட்டதாகவும் கூறப்படுகிறது.
கத்திக் குத்து தாக்குதலால் பலத்த காயமடைந்து ரத்தம் சொட்டிய நிலையிலும், நிலைமையை சமாளித்து பயணிகளின் பாதுகாப்பை உறுதி செய்ததாக கேப்டன் மச்சாரை குறித்து தெரிவிக்கப்பட்டுள்ளது. நெதன்யாகு கூறுகையில், கட்டுப்பாட்டு அறை கதவு திறக்கப்பட்டதால் பயணிகள் உள்ளிட்டோர் உள்ளே சென்று தாக்குதல் நடத்தியவரை மடக்கிப் பிடித்ததாகவும், விமானம் செங்குத்தாக கீழிறங்கிய தருணத்தில் கட்டுப்பாடு மீண்டும் கைப்பற்றப்பட்டதாகவும் குறிப்பிட்டார்.
மோடி, கேப்டன் மச்சாரை “உண்மையான நாயகன்” என புகழ்ந்து, அவரது துரித நடவடிக்கை பலரின் உயிரைக் காப்பாற்றி ஒரு பெரும் பேரழிவை தடுத்ததாக தெரிவித்தார். வெள்ளை மாளிகையில் செய்தியாளர்களிடம் பேசிய டிரம்ப், மிக ஆபத்தான நிலையில் இருந்தபோதும் பொறுப்புணர்வையும் சமயோசிதத்தையும் இழக்காமல் செயல்பட்டதே பேரழிவைத் தடுத்ததாக கூறினார்.
இதற்கிடையில், விமான நிலைய பாதுகாப்பு சோதனைகளைத் தாண்டி ஆயுதம் எப்படி வந்தது என்ற கேள்வியும் எழுந்தது. ஊடகத் தகவல்கள் மற்றும் நெதன்யாகுவின் குறிப்புகளின்படி, வெளியில் இருந்து கொண்டு வரப்பட்ட கத்தி அல்ல; கட்டுப்பாட்டு அறையில் அவசர தேவைக்காக வைக்கப்படும் ‘கிராஷ் ஆக்ஸ்’ என்ற அவசரகால கோடாரியே தாக்குதலுக்கு பயன்படுத்தப்பட்டதாக தெரிவிக்கப்பட்டுள்ளது.
