ஜப்பானில் நடைபெறும் 20வது ஆசிய விளையாட்டுப் போட்டியில் கோவையைச் சேர்ந்த தடகள வீராங்கனை வித்யா ராம்ராஜ் மூன்று பதக்கங்களை வென்று கவனம் ஈர்த்துள்ளார். அவரது சாதனைக்கு குடும்பத்தினரும் பயிற்சியாளர்களும் பாராட்டு தெரிவித்துள்ளனர்.
வித்யா 400 மீட்டர் தடை ஓட்டத்தில் வெண்கலம் வென்றார். இதன் மூலம், 1984 லாஸ் ஏஞ்சல்ஸ் ஒலிம்பிக்கில் இதே பிரிவில் பி.டி.உஷா பதிவு செய்த சாதனையை முறியடித்ததாக தெரிவிக்கப்பட்டுள்ளது. மேலும் 4x400 தொடர் ஓட்டத்தில் தங்கமும், கலப்பு அணிகள் பிரிவில் வெள்ளியும் வென்று நாட்டுக்கு பெருமை சேர்த்துள்ளார்.
இந்த வெற்றி, கோவை மாவட்டம் மதுக்கரையை அடுத்த வழுக்குப்பாறை மீனாட்சிபுரத்தில் மாரியம்மன் கோவில் அருகே வசிக்கும் பெற்றோர் ராம்ராஜ்–மீனா ஆகியோருக்கு பெரும் மகிழ்ச்சியை அளித்துள்ளது. தந்தை ராம்ராஜ் கூறுகையில், குடும்பத்தின் வசதி குறைவாக இருந்தபோதும் நிறுவன உரிமையாளர் உதவியால் மகள்களை படிக்க வைத்ததாகவும், கோவை சி.எஸ்.ஐ. பெண்கள் பள்ளியில் உடற்கல்வி ஆசிரியர் பேபி இருவரின் திறமையை கண்டறிந்து ஈரோடு அரசு விடுதியில் தங்கி பயிற்சி பெற வழிகாட்டியதாகவும் தெரிவித்தார்.
ஏழாம் வகுப்பு முதல் அங்கு தங்கி படிப்புடன் பயிற்சியை தொடர்ந்த இருவரும் தேசிய அளவிலான போட்டிகளில் பரிசுகள் பெற்றனர். பின்னர் வித்யாவுக்கு ரயில்வேயிலும், நித்யாவுக்கு வருமான வரித்துறையிலும் வேலை கிடைத்ததாகவும், வித்யாவின் முன்னேற்றத்திற்கு பயிற்சியாளர் நேபால்சிங் முக்கிய ஆதரவாக இருந்ததாகவும் ராம்ராஜ் கூறினார்.
இரட்டை சகோதரிகளில் ஒருவரான நித்யா, வித்யா 42 ஆண்டுகளாக இருந்த சாதனையை முறியடித்ததை பார்த்த போது மிகுந்த மகிழ்ச்சி ஏற்பட்டதாக கூறினார். வித்யா இனியும் பல சாதனைகள் படைப்பார் என்ற நம்பிக்கை இருப்பதாகவும், தன்னிடம் ஏற்பட்ட காயம் காரணமாக இனி போட்டிகளில் பங்கேற்க முடியாது என்றும் அவர் தெரிவித்தார்.
