சென்னை: திருவள்ளூர் மாவட்டம் பொன்னேரி அருகே உள்ள சிறுவாபுரி மற்றும் ஆண்டார்குப்பம் பாலசுப்பிரமணிய சுவாமி கோவில்களில் புதிய மேம்பாட்டுத் திட்டங்களுக்கு ஆலோசனை வழங்க தனியார் நிறுவனங்களை நியமிக்க, ஹிந்து சமய அறநிலையத்துறை டெண்டர் கோரியுள்ளதற்கு பக்தர்கள் எதிர்ப்பு தெரிவித்துள்ளனர்.
பக்தர்கள் கூறுவதன்படி, ஆண்டார்குப்பம் கோவிலுக்கு ரூ.2.5 கோடியிலும், சிறுவாபுரி கோவிலுக்கு ரூ.5 கோடியிலும் ஆலோசகர் நியமிக்க டெண்டர் விடப்பட்டுள்ளது. பக்தர்களுக்கான அடிப்படை வசதிகள் மற்றும் மேம்பாட்டுப் பணிகளுக்கான ஆலோசனையே இதன் நோக்கமாக குறிப்பிடப்பட்டுள்ளது.
அறநிலையத் துறையிலேயே பொறியியல் பிரிவும் பாரம்பரிய ஸ்தபதிகளும் உள்ள நிலையில், தனியாருக்கு பல கோடி ரூபாய் ஆலோசனைக் கட்டணமாக வழங்குவது தேவையற்றது என்றும் நிதி முறைகேடு சந்தேகத்தை ஏற்படுத்துவதாகவும் பக்தர்கள் விமர்சித்துள்ளனர்.
ஆலய வழிபடுவோர் சங்கத் தலைவர் டி.ஆர். ரமேஷ் கூறுகையில், சிறுவாபுரி முருகன் கோவிலில் ஏற்கனவே ரூ.16.50 கோடி மதிப்பில் பக்தர்கள் விடுதி, வரிசைக் கூடங்கள் உள்ளிட்ட பெருந்திட்டப் பணிகள் நடந்து வருவதாக தெரிவித்தார். இதே தேவைகளுக்காக மீண்டும் ரூ.5 கோடி மதிப்பிலான ஆலோசகர் டெண்டர் விடுவது நிதி முறைகேடு என அவர் குற்றம்சாட்டினார்.
மேலும், அறநிலையச் சட்டப்படி மூலதனச் செலவுகள் மற்றும் கொள்கை முடிவுகளை அறங்காவலர் குழுவே எடுக்க வேண்டும் என்றும், தர்மகர்த்தாக்கள் இல்லாத நிலையில் செயல் அலுவலர்கள் அன்றாட நிர்வாகத்தை மட்டுமே கவனிக்க வேண்டும் என்றும் அவர் வலியுறுத்தினார். பாரம்பரிய ஸ்தபதிகள், பொறியாளர்களை புறந்தள்ளி சிற்ப சாஸ்திரம் அறியாத தனியாருக்கு ஆலோசனைக் கட்டணம் வழங்குவது கோவில் தொன்மைக்கு பாதிப்பை ஏற்படுத்தும் எனக் கூறி, இரு டெண்டர்களையும் ரத்து செய்ய வேண்டும் என்று கோரினார்.
