மதுராந்தகம் மற்றும் தாராபுரம் சட்டசபை தொகுதிகளுக்கான இடைத்தேர்தல் பிரசாரம் வெள்ளிக்கிழமை மாலையுடன் நிறைவடைந்தது.
தேர்தல் கமிஷன் அறிவிப்பின்படி அக்டோபர் 6ம் தேதி வாக்குப்பதிவு நடைபெறுகிறது; அக்டோபர் 9ம் தேதி வாக்கு எண்ணிக்கை நடைபெற உள்ளது. இத்தேர்தலில் ஐந்து முனை போட்டி நிலவுகிறது.
பிரசாரத்தின் கடைசி நாளில் தாராபுரத்தில் பல இடங்களில் முதல்வர் விஜய் ரோடு ஷோ நடத்தினார். இரு தொகுதிகளிலும் அமைச்சர்கள் இறுதிக்கட்ட பிரசாரத்தில் ஈடுபட்டனர். திமுக, அதிமுக, நாம் தமிழர் கட்சி, கம்யூனிஸ்ட் கட்சி வேட்பாளர்கள் தீவிரமாக ஓட்டு சேகரிப்பில் ஈடுபட்டதாக தெரிவிக்கப்பட்டது.
தாராபுரம் தொகுதியில் நாம் தமிழர் கட்சி வேட்பாளரை ஆதரித்து அக்கட்சியின் ஒருங்கிணைப்பாளர் சீமான் பேசினார். இதனிடையே, உரிய அனுமதி பெறாமல் பிரசாரம் செய்ததாக கூறி அக்கட்சியின் வேட்பாளர் கார்த்திகா கைது செய்யப்பட்டார்; இதனால் கட்சியினர் மற்றும் போலீசார் இடையே வாக்குவாதம் ஏற்பட்டதாக தகவல்.
பிரசாரம் முடிந்த நிலையில், மதுராந்தகம் மற்றும் தாராபுரத்தில் இருந்து வெளியூர் நபர்கள் மாலை 6 மணிக்குள் வெளியேற வேண்டும் என தேர்தல் கமிஷன் உத்தரவிட்டது. திருமண மண்டபங்கள், சமுதாயக்கூடங்கள், தங்கும் விடுதிகள், விருந்தினர் இல்லங்களில் வெளியூர் நபர்கள் தங்கியுள்ளனரா என கண்காணிப்பு மேற்கொள்ளப்படும் என்றும், வாக்காளர்களை அழைத்து வர வேட்பாளர்கள் வாகன ஏற்பாடுகள் செய்யக்கூடாது என்றும் எச்சரித்தது. மேலும், ஓட்டுச்சாவடியிலிருந்து 100 மீட்டருக்கு வெளியே மட்டுமே தேர்தல் அலுவலகம் அமைக்கலாம்; அதில் இரண்டு பேர் மட்டுமே இருக்க வேண்டும் என்றும் தெரிவித்தது.
