சென்னை: இடைத்தேர்தல் நடைபெறும் மதுராந்தகம் மற்றும் தாராபுரம் சட்டமன்றத் தொகுதி வாக்காளர்களிடம், ‘துரோக சிந்தனைக்கு சவுக்கடி கொடுங்கள்’ என்று அ.தி.மு.க. பொதுச்செயலர் எடப்பாடி கே. பழனிசாமி வேண்டுகோள் விடுத்துள்ளார்.
அவர் வெளியிட்ட அறிக்கையில், சட்டசபைத் தேர்தலுக்குப் பிறகு ஆட்சி அமைக்க தேவையான எம்.எல்.ஏ.க்கள் எண்ணிக்கை இல்லாத நிலையிலும், பிற கட்சிகளின் ஆதரவுடன் த.வெ.க. மைனாரிட்டி ஆட்சியை நடத்தி வருவதாக குற்றம்சாட்டினார்.
மேலும், குறுக்கு வழி முயற்சிகள் மற்றும் ‘குதிரை பேரம்’ போன்ற நடவடிக்கைகள் மூலம் ஜனநாயகம் கேலிக்கூத்தாக்கப்பட்டதால்தான் இந்த இடைத்தேர்தல் ஏற்பட்டதாகவும் அவர் கூறினார். துரோகத்தை இழைத்தவர்கள் த.வெ.க. சார்பில் மீண்டும் போட்டியிடுவதாகவும் அவர் தெரிவித்தார்.
இந்தச் சூழலில், அ.தி.மு.க.க்கு துரோகம் செய்தவர்களுக்கும், குறுக்கு வழியில் பெரும்பான்மை பெற த.வெ.க. மேற்கொண்டதாக அவர் கூறும் மறைமுகச் செயல்களுக்கும் மக்கள் தக்க பாடம் புகட்ட வேண்டும் எனவும், இனி யாருக்கும் இப்படியான துரோக சிந்தனை வராத வகையில் வாக்குப்பதிவில் உறுதியான பதிலடி கொடுக்க வேண்டும் எனவும் அவர் கேட்டுக் கொண்டார்.
