தமிழகத்தில் அரசு மருத்துவமனைகளில் பிறக்கும் குழந்தைகளுக்காக ‘தாய் மாமன் தங்க மோதிரம் திட்டம்’ நடைமுறைக்கு வந்துள்ளது. மதுரை ராஜாஜி அரசு மருத்துவமனையில் செப்.28 அன்று நடந்த நிகழ்ச்சியில் முதல்வர் விஜய் திட்டத்தை தொடங்கி வைத்தார்.
இந்த ஆண்டு ஜூன் 22 முதல் அரசு மருத்துவமனைகளில் பிறந்தும் பிறக்கவுள்ளும் அனைத்து குழந்தைகளுக்கும் 1 கிராம் எடையிலான, 22 காரட் ‘ஹால்மார்க்’ முத்திரையுடன் கூடிய தங்க மோதிரம் வழங்கப்படும். இதில் பயன் பெற குழந்தையின் தாய் தமிழகத்தில் வசிப்பவராக இருக்க வேண்டும்.
மோதிரம் பெற தனியாக விண்ணப்பிக்க தேவையில்லை என தெரிவிக்கப்பட்டுள்ளது. மருத்துவமனை மற்றும் பிறப்பு பதிவு விவரங்களின் அடிப்படையில் தகுதி சரிபார்த்து நேரடியாக வழங்கப்படும். இரட்டை குழந்தைகள் பிறந்தால், இருவருக்கும் தனித்தனியாக மோதிரம் வழங்கப்படும்.
இத்திட்டம் தமிழக வெற்றிக் கழகத்தின் தேர்தல் வாக்குறுதிகளில் ஒன்றாகவும் குறிப்பிடப்படுகிறது. இதற்காக ஆண்டுக்கு ரூ.755.83 கோடி நிதி ஒதுக்கீடு செய்யப்பட்டுள்ளதாகவும், முதற்கட்டமாக 1.28 லட்சம் மோதிரங்கள் கொள்முதல் செய்து வழங்கப்பட்டு வருவதாகவும் கூறப்பட்டுள்ளது.
ஏழை மற்றும் நடுத்தர குடும்பங்களுக்கு இது ஒரு நிதியுதவியாக பார்க்கப்படுவதால் பொதுமக்களிடையே வரவேற்பு இருப்பதாக கூறப்படுகிறது; அரசு மருத்துவமனைகள் மீதான நம்பிக்கை அதிகரித்து அங்கு பிரசவங்கள் கூடும் என்றும் எதிர்பார்க்கப்படுகிறது. அதே நேரத்தில், இந்த நிதியை மருத்துவமனைகளின் உள்கட்டமைப்பு, நவீன கருவிகள் அல்லது தாய்-சேய் ஊட்டச்சத்து மற்றும் பராமரிப்புக்கு நேரடியாக பயன்படுத்தியிருக்கலாம் என்ற விமர்சனங்களும் முன்வைக்கப்படுகின்றன.
