தாராபுரத்தில் நடைபெற்ற தேர்தல் பிரசாரத்தில் நடத்தை விதிமுறைகளை மீறியதாக, தி.மு.க. இளைஞர் அணி செயலரும் எதிர்க்கட்சித் தலைவருமான உதயநிதி ஸ்டாலின் மீது போலீசார் வழக்குப்பதிவு செய்துள்ளனர்.
தி.மு.க. வேட்பாளர் சுகன்யாவை ஆதரித்து நடந்த பிரசாரத்தில், 8 வயது சிறுவனை பிரசார வேனில் ஏற்றி பேச வைத்ததாக குற்றச்சாட்டு எழுந்தது. அந்த சிறுவன் ஓட்டு கேட்டு பேசியதுடன், முதல்வர் விஜயை அவமதிக்கும் வகையில் பேசியதாகவும் கூறப்படுகிறது. சிறுவர்களை தேர்தல் பிரசாரத்திற்கு பயன்படுத்தக் கூடாது என்ற விதிமுறை உள்ள நிலையில், திருப்பூர் மாவட்ட போலீசார் வீடியோவை ஆய்வு செய்து தாராபுரம் காவல் நிலையத்தில் வழக்குப்பதிவு செய்ததாக தெரிவிக்கப்பட்டுள்ளது.
இதற்கிடையில், தி.மு.க. தலைவர் மற்றும் முன்னாள் முதல்வர் மு.க. ஸ்டாலின் மீது த.வெ.க.வினர் தமிழகம் முழுவதும் புகார் மனுக்கள் அளித்துள்ளனர். அக்டோபர் 2 அன்று தாராபுரத்தில் நடந்த பிரசாரத்தில், த.வெ.க. வேட்பாளர் சத்யபாமாவை உருவ கேலி செய்து பேசியதாக குற்றச்சாட்டு முன்வைக்கப்பட்டுள்ளது.
இந்த விவகாரத்தில் 20க்கும் மேற்பட்ட இடங்களில் போலீசில் புகார் அளித்ததுடன், தேர்தல் கமிஷனிலும் மனு கொடுத்துள்ளதாக த.வெ.க. தரப்பு தெரிவித்துள்ளது. மதுராந்தகம் மற்றும் தாராபுரம் இடைத்தேர்தலுக்கான பிரசாரம் நேற்று மாலை 6 மணியுடன் நிறைவடைந்த நிலையில், தந்தை-மகன் மீது எழுந்த குற்றச்சாட்டுகள் அரசியல் வட்டாரத்தில் பரபரப்பை ஏற்படுத்தியுள்ளது. நாளை காலை 7 மணி முதல் மாலை 6 மணி வரை ஓட்டுப்பதிவு நடைபெற உள்ளது.
