தஞ்சாவூர் மாவட்டம் ஆம்பலாப்பட்டு இலுப்பைத் தோப்பு கிராமத்தில், தாம் படித்த அரசு மேல்நிலைப் பள்ளியின் வளர்ச்சிக்காக ரூ.4 கோடி நன்கொடை வழங்கிய முன்னாள் மாணவர் வாஞ்சிநாதன் (42) அவரை கிராம மக்கள் பாராட்டி கௌரவித்தனர்.
நன்கொடையின் முதற்கட்டமாக ரூ.65 லட்சம் மதிப்பீட்டில் கூரையுடன் கூடிய கலையரங்கம் கட்டப்பட்டுள்ளது. மீதமுள்ள நிதியில் கூடுதல் வகுப்பறைகள் அமைத்தலும், ஸ்மார்ட் கிளாஸ் வசதிக்கான சாதனங்கள் வாங்குதலும் திட்டமிடப்பட்டுள்ளதாக தெரிவிக்கப்பட்டது.
ஓய்வு பெற்ற ஆசிரியர் ராமலிங்கம் கூறுகையில், பள்ளியில் தற்போது சுமார் 400 மாணவர்கள் படிப்பதாகவும், உள்கட்டமைப்பு மேம்பாட்டுக்காக பல முன்னாள் மாணவர்கள் தொடர்ந்து உதவி செய்து வருவதாகவும் தெரிவித்தார். மாணவர்களை அழைத்து வர வேன், சிசிடிவி கேமராக்கள், வகுப்பறை கட்ட நிலம் உள்ளிட்ட உதவிகள் வழங்கப்பட்டுள்ளன என்றும் அவர் கூறினார்.
வாஞ்சிநாதன் வழங்கிய நிதி மூலம் பள்ளியை தனியார் பள்ளிகளுக்கு நிகராக தரம் உயர்த்த வேண்டும் என்ற நோக்கில் பணிகள் முன்னெடுக்கப்படுகின்றன. கிராமப்புற மாணவர்களின் வசதிக்காக பள்ளிக்கு பஸ் வாங்குதல், நான்கு அறைகள் கொண்ட கூடுதல் வகுப்பறைகள் கட்டுதல், அனைத்து வகுப்புகளுக்கும் ஸ்மார்ட் கிளாஸ் ஏற்படுத்துதல் ஆகிய திட்டங்களும் நடைமுறையில் உள்ளன.
முன்னாள் மாணவர்களின் தொடர்ச்சியான ஆதரவால் பள்ளியின் வசதிகள் மேம்பட்டு, மாணவர் சேர்க்கையும் அதிகரித்துள்ளதாக ஆசிரியர் தெரிவித்தார்.
