ரூ.2.50 லட்சம் லஞ்சம் தொடர்பான வழக்கில், சிவில் விமான போக்குவரத்து தலைமை இயக்ககம் (டிஜிசிஏ) துணை இயக்குநர் சுசில்குமார் கர்க் (44) மற்றும் விமான பயிற்சி நிறுவன இயக்குநர் சச்சின் கேசவ் பானே (40) ஆகியோரை சி.பி.ஐ. அதிகாரிகள் கைது செய்துள்ளனர்.
சென்னை மீனம்பாக்கத்தில் செயல்படும் டிஜிசிஏ அலுவலகம், விமான பயிற்சி மையங்களுக்கு உரிமம் வழங்குதல் உள்ளிட்ட பணிகளை கண்காணிக்கிறது. கர்க், விமான தகுதி நிலை (Airworthiness) பிரிவில் துணை இயக்குநராக பணியாற்றி வந்ததாக தெரிவிக்கப்பட்டுள்ளது.
அக்டோபர் 3 அன்று மாலை 5 மணியளவில், பயிற்சி நிறுவன இயக்குநரிடம் லஞ்சம் கேட்டதாக டில்லி சி.பி.ஐ.க்கு புகார் வந்ததைத் தொடர்ந்து, சந்தேகநபர்களின் நடவடிக்கைகள் ரகசியமாக கண்காணிக்கப்பட்டதாக அதிகாரிகள் கூறினர்.
விசாரணையில், மகாராஷ்டிரா மாநிலம் தானே பகுதியில் உள்ள “எக்வி ஏர் டிரெய்னிங்” நிறுவனம், சேலம் மாவட்டம் ஓமலூர் அருகே காமலாபுரம் பகுதியில் ஏழு விமானங்களுடன் பயிற்சி மையம் நடத்தி வருவது தெரியவந்தது. அந்த மையத்தை கர்க் ஜூலை 31 அன்று ஆய்வு செய்தபோது விதிமீறல்கள் மற்றும் குறைபாடுகள் இருப்பதாகக் கண்டறிந்ததாக சி.பி.ஐ. தெரிவித்துள்ளது.
இந்த குறைபாடுகளை புறக்கணிக்க லஞ்சம் கேட்டதாகவும், பின்னர் ரூ.50,000 மதிப்புள்ள மொபைல் போன் ஒன்றையும், அதன்பின் ரூ.2.50 லட்சத்தையும் பெற்றதாகவும் சி.பி.ஐ. குற்றச்சாட்டு முன்வைத்துள்ளது. கைது செய்யப்பட்ட இருவரையும் டில்லிக்கு அழைத்து சென்று மேலதிக விசாரணை நடத்தி வருவதாக தெரிவிக்கப்பட்டுள்ளது.
